Shillong, Nohprah 13: Ka Synjuk ki Seng Samla Pynthorumkhrah Pyllun ka la lum ka la lang ïa ki paidbah jong ki saw tylli ki shnong kiba kynthup ïa ka Dorbar shnong Golflink, Lumshyiap, Pynthorbah, bad Langkerding Mihngi da kaba pynlong ïa jingïaid Karol Khristmas.
Ka phang jong kane ka jingïaid Karol ka dei ka “Jingïatylli Lang” ki paidbah Nongshong Shnong bad ki Balang kiba don ha kitei ki shnong. Ïa katei ka jingïaid Karol ba la pynlong la sdang na jingkieng Mawpat ïa kaba la ïaid tawïar ïa ka Shnong Lumshyiap, Golflink, Pynthorbah bad pynkut ha St. Joseph Higher Secondary da ka jingïalehkmen ba la lamkhmat da u Bah Manik Kharkamni ba ju khot ka Pla Ïew.
Kawei ka mat kaba ka Synjuk Seng Samla Shnong kaba khia hakhmat halor ka jingpynlong ïa ka Khristmas Karol ka dei ban tehsong ïa ki samla bad ban wanlam sha ka jingbha ban lait na ki jingsniew.
Ka kam kaba khia tam ïa ka Synjuk ki Seng Samla Shnong Pynthorumkhrah kaba la buh ha ki 7 bnai naduh ba la seng, ka long ka jyllei u Drok ha kitei ki saw shnong kaba ki khun samla ki la shah synshar bad jot ki longïing longsem. Kumta na ka liang ka Seng ka kthong bad ka rat da ka jingïatreilang ki rangbah Shnong ban nym ailad bad ïalam ruh ïa ki samla kiba la ngop ban buh ha ki Rehabilitation Centre.
Ïa katei ka jingïaid Karol ba la pynlong, la ïalam da u Samla Khraw Pyrkhat Mynsong kum u Chairman bad u Samla Manchwa Ksoo General Secretary ryngkatlang ki dkhot.
Ha jingpynkut ïa ka Karol ha Skul St. Joseph la pynlong ïa ka jinglehkmen ïa ki khynnah rit bad ki paidbah da ka jingshim bynta jong ki kynhun Balang Khristan kiba kynthup ïa ka Balang Presbyterian Pynthorbah, ka Balang U Khrist Pynthorumkhrah, Balang U Blei bad ka Balang Baptist bad ka Parish Pynthorumkhrah ba la shim bynta da u Phadar Alistar Marweiñ Assistant Parish Priest, uba la jingkren na ka liang jong ki Balang bad u Pastor Amminot Sohliya u la ai ka jingkyrkhu ban ot cake Khristmas.
Na ka liang ki Dorbar Shnong la shim bynta da ki Rangbah Shnong ki Secretary Shnong ha kaba u Dr. K P Phawa Secretary Shnong Lumshyiap u la ai ka jingkren na ka liang ki Dorbar Shnong. Kiba la donlang ki kynthup ïa u Bah P N Syiem MDC bad Deputy CEM ka KHADC, u Additional Deputy Commissioner u Bah Ronnieson Wahlang MCS East Khasi Hills bad kiwei kiba la ai jingkren.
