Shillong, Nohprah 13: U Chief Executive Member ka KHADC Bah Pyniaid Sing Syiem, hynne ka sngi Thohdieng, ula ong ba ka jingweng jingkyrshan jong ka Seng Congress kan ym ktah eiei ïa ka Executive Committee kaba ïalam da ka NPP ha KHADC.
“Ka Congress kaba don 3 ngut ki MDC, ka la rai mih noh na ka Khasi Hills Democratic Front (KHDF), kane kan ym ktah satia ïa ka EC” ong u CEM.
Haba kylli la ka EC kaba ïalam da ka NPP kan don jingma ha ka Dorbar Tlang lada jia ba wanrah ïa ka No Confidence Motion, u CEM ula ong, “Ngin sa ïa peit ha katei ka por” haba kyntait ban ïathuh katno ngut ki MDC ki don ha ka seng NPP ne ha ka KHDF.
Kane ka jingweng ka Congress ïa ka jingkyrshan ha KHADC kala wan jia hashuwa jong ka Dorbar Tlang jong ka Council ka ban long la 19 bad 20 tarik Nohprah.
Ki MDC ka congress ki kynthup ïa u Bah PN Syiem uba bat ïa ka shuki Deputy CEM, Bah Victor Rani – Executive Member uba dang shu pynïasoh sha ka Congress bad u Bah Ronnie Lyngdoh MDC ka Mylliem.
