Jowai, Nohprah 03: U Myntri Rangbah duh ka jylla u Conrad. K. Sangma mynta ka sngi haba ïakren bad ki lad pathai khubor ula ong ba ka jingslem ban pyndep ïa ka Iawmusiang ka dei na ka daw ka jingbym sdang treikam jong u Contractor ïa ka kam wat hadien ba ka sorkar kala dep ban pyllait ïa ka Bills.
Ula pynsngew ruh ba ka sorkar hadien ba la dep pyllait ïa ka Bill kala don ka jingkyrmen skhem ba ka kam kan ïaid noh shakhmat hynrei u Contractor ym shem la sdang ïa ka kam wat hadien bala pynkymmaw ïa u na ka por sha ka por.
Halor kane ka jingslem ban pyntrei ïa ka Iawmusiang na ka liang u MLA ka Jowai Constituency ula tukla mardor ïa kane kam, hynrei la lap pynban ba u Contractor ba pyntrei ïa kane ka kam ula dep ban ujor syndon sha ka ïing bishar ba donburom ha kaba ïadei bad kane ka kam jong u.
U Myntri Rangbah ula pyntip na ka liang ka sorkar ka la kyntu ïa u tei u Contractor ba un weng noh ïa katei ka mukot duma khnang ba ka jingpyntrei kan sdang noh shiat shait.
Shuh shuh ula pynsngew ba hapoh kine ki 4 snem tam ki don shibun ki kam ba dangsah khlem pat pyndep, hynrei dei lyngba kane ka sorkar hapoh ka jingïalam ka NPP la lah ban pyntrei noh ïa ki project kiba dang sah kum ka ïing dorbar (Assembly), Taj Vivanta nalor kiwei de.
Wat hapdeng kine ki jingeh ka sorkar kala pyrshang ban pyndep ïa kine ki kam ba dang sahteng khamtam ïa ka Iawmusiang da ka jingtukla lang jong u MLA ka thiañ bad u kyrmen ba kane ka jingpyntrei thymmai kan sdang noh shen ha kine ki sngi ban wan.
