Jowai, Jylliew 01: Ki Waheh Chnong ka thaiñ Iooksi Saphai, ki kwah ban pynshai paidbah halor ka khubor jong ka Synjuk Ki Waheh Chnong Ri Jaiñtia halor ka jingdawa bhah laka jong ha kaba ïadei bad ka State Job Reservation Policy kata ka long 20% ïa ki Jaiñtia.
La ong ba kane kam dei shuh ka por jong ka jingïa sngewpher thaiñ, ne ka jingïapharia ïaka Jaitbynriew, hynrei ka dei ka por jong ka jingïatylli naka bynta ban ïakhun ïaki jingeh jong ka Jaitbynriew. “Ka kyrteng Jaiñtia kam dei ka kyrteng ka Jaitbynriew, hynrei ka dei tang ka kyrteng ka thaiñ, bad la sngewthuh ruh ba ha Jaiñtia la kynthup lang ïa baroh kiwei pat ki Jaitbynriew kum ki Biate, ki Karbi bad kiwei kiwei bad ngim lah ruh ban kyntait dalei lei ruh ïaki kum ki Nong Jaiñtia ba pura”.
La pynsngew ba naka liang ki Waheh Chnong ka thaiñ Iooksi Saphai, ki ai ka jingkyrshan kaba pura ïa u Bah Ardent M Basaiawmoit ha kaba ïadei bad ka jingdawa ban pynthymmai (Review) ïaka State Job Reservation Policy.
Khatduh khatwai ki Waheh Chnong ka thaiñ Iooksi Saphai, ki la kitbok kitrwiang ruh ïa u Bah Ardent Miller Basaiawmoit ba un nang ïoh ïaka met kaba shait ba khlaiñ bad kumjuh ruh ïabaroh ki paidbah ka Bri U Hynñiewtrep hi, kyrmen ba kane ka jingdawa jong ka Jaitbynriew kan sa urlong khlempep shisien ka sngi daka jingdon ryngkat U Blei iangi kum ka Jaitbynriew.
Hynrei na ka liang ka sorkar mynta ka sngi Palei kala pynmih ïaka Notification ban thaw da ka Expert Committee ka ban peit sylli ïa ka Reservation Policy ba thymmai hapoh ka jylla, wat na ka liang u Bah Ardent Miller Basaiawmoit ruh mynta hi ka sngi ula weng noh ïa ka jingshah thngan.
