Khliehriat jylliew 01: Ki nongialam jong ka Hynñiewtrep Youth Council, East Jaiñtia Hills District, mynta ka sngi ki la leit ban iakynduh ia u Executive Engineer jong ka tnat Public Work Department (Road) NEC Division, East Jaiñtia Hills District bad ki la kyntu ïa u ba un shim khia ban maramot noh ïa ka surok kaba na Khliehriat shaduh Rymbai PHC namar kane ka surok ka la jot bad julor bha bad ka long ruh kaba i jah burom ba kum kine ki surok kiba jot ba pei kin don ha ka sorbah Khliehriat, kaba dei ka District Head-Quarter jong ka District kaba bun ki briew wat kiba na bar ruh ki ju iaid lyngba na kane ka surok.
Kane ka surok ka iarap shibun ïa ki paidbah kiba donkam ban leit sha shnong Rymbai bad sha Ladrymbai bad ki bun ruh ki ophis sorkar ki don ha kane ka bynta ha kaba ki nongtrei sorkar ruh ki ju iaid lyngba na kane ka surok, ym tang katta, wat ki khynnah skul ruh ki ju iaid da ka kjat na kane ka surok. Katkum ka jingthoh ba la buh hakhmat utei u heh sorkar, ba la soi da u President HYC-EJHD, u bah Preios Pale bad u General Secretary, u bah Arky Lamare katkum ka seng ka la pynpaw ka jingsngew khia halor ka jinglong jingman katei ka surok (PWD-Road) kaba la buh jingeh ruh ïa ki kali kiba iaid bad kumjuh ruh ka buh jingma ïa ki khynnah skul kiba ju iaid da ka kjat na kane ka surok, namar ka surok ka la dap sa tang da ki thliew bad ka um ktieh kaba lang.
Te na ka liang ka seng, ka la kyntu jur ïa ka tnat ba kan shim khia noh kham kloi ban maramot ïa katei ka surok. Kitei ki nongialam ka HYC East Jaiñtia Hills District, ki la ong ruh ba ha jing ïa kynduh jong ki bad u E.E ka tnat PWD ha Khliehriat, u la ong ba na liang ka ophis ruh ka la don hi ka jingiaid lynti ha kaba iadei bad ka jingmaramot ïa katei ka surok bad u la kular ruh ba un sa shim khia ïa kane ka jingkyntu ka seng ban bud dien ïa ka jingmaramot ïa katei ka surok.