Plie u Bah Justine ïa ka jingrakhe Platinum jubili ka Balang Catholik Pamrakmai

Khliehriat, Jylliew 01: Ka Balang Catholik Pamrakmai, East Jaiñtia Hills District, mynta ka sngi ka la sdang ïa ka pynkhreh ïa ka rakhe pyndonburom ïa ka jingdap 75 snem ka Balang bad, ia kane yn pynkut ha u bnai jymmang jong u snem 2024, u bah Justine Dkhar, uba dei u MLA ba rim jong ka Khliehriat, mynta ka sngi u la long kum u kongsan uba la plie pyrda ïa kane ka jingrakhe jubili, ha kaba u la pynher ruh ïa ka lama jubili bad plie ïa u maw nongrim jong kane ka jingrakhe jubili.
Haba kren kum u u Kongsan, u bah Justine Dkhar, u la ai ka jingiaroh bad sngew nguh ïa u Blei bad ïa ka Balang Katholik Pamrakmai kaba la kiew shaphrang, u la ai ka jingkhublei jubili ïa baroh ki riew ngeit jong ka Balang Katholik Pamrakmai, ha kajuh ka por, u la pynpaw ruh ka jingsngew nguh, sngew burom ïa ki shiphew ngut ki riew ngeit, kiba dei ki nongsdang kiba la seng ïa ka jingngeit Kristan Katholik ha kane ka shnong “wat lada ki mad shibun ki jingeh, ki jingjynjar ha kito ki por ban ialap ïa ka ktien u Blei, hynrei lyngba ka jingiaineh bad jingtrei shitom jongki la lah ban pynlong haduh katne ïa ka Balang haduh ban da ioh ban rakhe ïa kane ka jubili kaba mynta” ong u bah Justine, u la kyntu ruh ïa ki nongialam jong ka Platinum Committee ba kynthup naduh ki Sub committee bapher bapher ba kin pynkhreh janai bha ia ki bynta jong ka jingim ba kynja mynsiem bad jingpynkhreh bapher bapher da ka jingshongkun shong Blei ha baroh kane ka snem jong ka jinglehkmen jubili.
U la ai ka jingkitbok kitrwiang ruh ïa ka Balang ba kan nang lah ban leh bha shuh shuh bad ba kan nang kiew nang san ha ka jingngeit bad ba ym dei ban shah ialam bakla.
U kyrwoh khubor, u iathuh ruh ba ïa ka Balang Catholik ha katei ka shnong la seng da da ki shiphew ngut ki Khristan kiba nyngkong kiba na ka kur Siangshai, kiba la tip kyrteng kum ka Maria (Kso) Siangshai,Ka Regina Siangshai, Ka Nerella Siangshai, U Petrus Siangshai, U Blasius Siangshai, U Kilbert Siangshai, U Paulus Siangshai, U Norbert Siangshai, Ka Bena Siangshai.
Ia katei ka Balang la seng nongrim ha ka 3 tarik u jymmang 1949 bad mynta ka la kynjoh sha ka 75 snem kynthih, sngewtynnad ruh ban tip ba ka Balang ka la nang kiew bad nang roi na ka por sha ka por ha ka jing don ki riew ngeit bad ha ka jinglong mynsiem bad ïa ka phang pdeng jong kane ka jingrakhe jubili la pynshong nongrim na ka kitab 1-Jingthoh Kynmaw 16;12 “To kynmaw ïa ki kam phylla ba U la leh,ïa ki kambah jong U”
Ïa ka jinglehniam ha kane ka sngi la pyndep da u Rev. Fr. Aibor Dennis Nongbah, Parish Priest Ladrymbai.
Ha kane ka sngi, la pynphuh pynphieng shuh shuh ïa kane ka sngi lehkmen jong ka Balang da ki jing shad, ki jingrwai na ki khun ka jong ka Balang bad la pynkut ïa ka prokram da ki kyntien ai khublei na u samla Wellson RD Siangshai u ba long u Finance Secretary jong ka Platinum Comittee.
Kum shi bynta jong ka jingrakhe, ka Balang kan pynlong bun jait ki prokram ba kynthup ka Bible Quiz, ki jingialehkai Sports, ki Seminar & Retreat bad kiwei kiwei.
Ki paidbah riewngeit jong ka Balang naduh ki nongialam ka Parish Pastoral Council, Ki nongkitkam ka Pamra -Jalyiah Circle, ki Rangbah Balang, ki nong shah khot sngewbha U Waheh Shnong, u bah Iaikiewbha Rymbai, Bormi Dkharu ba dei u Symbud Waheh Shnong, kumjuh ruh u Assistant Parish Priest, u Rev. Fr. Ebormitre H Lamre ryngkat ki Sister, Headkatekis ki la ia wan ban ia shim bynta lang ha kane ka sngi.