Ba thmu kit biang ïa ki tiar na Nongstoiñ MCH Hospital, tur ki sengbhalang bad longkmie, hap pynsangeh ka DMHO

Nongstoiñ, Jylliew, 1: Da ka jingbitar, ki nongïalam sengbhalang bapher bapher ka West Khasi Hills ki la tur kynsan biang puk sha MCH Hospital Nongstoiñ ha ka sngi palei, hadien ba la ïoh jingtip ïa ka jingdon ka trok kaba thmu ban kit biang ïa ki tiar ki tar na kane ka jaka sumar bad ban pynpoi sha Civil Hospital Mawkyrwat.
Lah ban pynkynmaw ba ha ka 23 tarik baroh ki tiar ki tar kynthup ïa ki 50 tylli ki jingthiah, ki machine bapher bapher, la wan kit da ki ar tylli ki trok bad la dep rah noh ïa ki baroh sha Hospital kaba ha Mawkyrwat. Hynne ka sngi pat sa kawei ka trok ka la ieng biang ha phyllaw ka MCH Hospital Nongstoiñ bad ki nongbylla ki dang bunkam ruh ban pynrung ïa ki x-ray machine shapoh ka trok.
Ki nongïalam sengbha-lang mar ïa poi ha katei ka jaka, ki la khang ban thep ïa ki tiar ha ka trok bad hadien katto katne la wan poi sa ki nongïalam seng longkmie, kiba la kyrshan ba ym dei ban ailad ban kit ïa ki tiar na kane ka Hospital. Ym tang katta hynrei ki la phah thep biang ïa ki tiar shapoh Hospital bad ap haduh ban da wan poi syndon I DMHO.
Hadien katto katne jong ka jingap khrui da ki sengbhlang, la wan poi pat I DMHO I ba la pynpaw ba ka jingpynkit ïa ki tiar ki tar sha Mawkyrwat ka dei namar ha Mawkyrwat la dep don ne thung ïa ki nongtrei. Kumta ka sorkar ka la phah shwa ïa ki tiar sha katei ka Hospital, katba ha Nongstoiñ ym pat sanction ne buh nongtrei haduh mynta. Kumta la hap ban rah shwa sha Mawkyrwat ïa ki tiar.
Hynrei, ka jingbym ailad shuh da ki sengbhalang ban dang kit ïa ki tiar ba dang sah kum ki x-ray machine bad kiwei, na ka liang jong I DMHO I la ong ba hap pynsangeh shwa ban rah ïa ki tiar. I la ong ban hap ai jingthoh shwa sha ki bor ba halor kane ka bynta bad ap ruh ïa ka hukum na ki bor ba halor.
Na ka liang ki nongïalam sengbhalang bad seng longkmie, ki la pynpaw ba da lei lei kim shah ban kit ïa ki tiar sha Mawkyrwat. Ki la ong ba ha ka jingshisha ka Nongstoiñ ka la donkam ban plie noh bad thung noh ïa ki nongtrei ha kane ka jaka sumar, namar naduh u 2018 la dep ban pyndep ïa ka building. Kumjuh ruh ïa ki tiar la dep ban wanrah bad kaba dang sah ka long ban thung nong ïa ki nongtrei. Hynrei, shu kyndit kyndit leit rah pynban sha Mawkyrwat.
Lada ka Mawkyrwat ka donkam ïa ki tiar bad ba la dep don kita ki nongtrei, hato balei ka sorkar kam sanction noh mar mar ïa ki tiar ki tar na ka bynta ka South West Khasi Hills. Hynrei ban shu pynkit pynban ïa ki tiar kiba dei hok jong ka MCH Hospital Nongstoiñ, ka dei kaei kaei kaba ki paidbah ka West Khasi Hills hi kim lah ban pdiang da lei lei.
Ki nongïalam sengbhalang ki dang ïai ap ruh ïa ka jingpynshai na ka sorkar, kumba ki la dep ai jingthoh ha u DC bad DMHO naduh ka sngi ba ar mynta ka taiew, ba kaei ka daw ba hap kit pynban ïa ki tiar kiba dei hok ha MCH Hospital Nongstoiñ. Balei ym lah ban sanction noh ïa ki nongtrei ha kane ka jaka sumar. Ka jingai por ka dang sah sa katto katne sngi bad lada ka sorkar bad ki bor ka tnad ka koit ka khiah, kim lah ban jubab, kim banse ban ïakhih da kaba tyngeh.
I Kong A.K Kharsyntiew iwei na ki nongïalam seng longkmie, I la ong ba ha ka jingshisha ki paidbah ka District ki la ap khmih lynti ban plie noh ïa kane ka jaka sumar ïa ki longkmie ba ar met bad khunlung. Hynrei, kine ki akor ban shu kit noh pynban ïa ki tiar sha kiwei ki District ka long kaei kaei kaba sngewsih bad kaba pynbitar shisha ïa ki paidbah bad ïa ki longkmie.
Ha ka por ba leit sha katei ka MCH Hospital I la phone ruh ïa u MLA Bah Gabriel Wahlang, hynrei na ka daw ba u don ha Shillong, kumta u la shu kyntu sha ki longkmie bad sengbhalang ba kim dei ban ailad ban pynkit ïa kit tiar na kane ka jaka sumar. U la ong ruh ba u la dep thoh sha ka myntri ba dei peit ba ym dei ban kit ïa ki tiar na kane ka Hospital naduh ka 18 tarik u Jymmang 2023.
Na ka liang ki nongïalam sengbhalang ki la pynpaw shai ba kaei kaba donkam nangne shakhmat ka long ka jingïatylli jong baroh liang na ka bynta ka bha ka miat bad ka roi ka par jong ka Nongstoiñ West Khasi Hills. Namar ban shu shah leh katba mon ïa ki paidbah Nongstoiñ ha kita kiba sngew don bor, yn ym lah satia ban pdiang bad yn ym ailad hi ruh.