Shillong, K’lyngkot, 13: U Secretary, DARE & Director General, ICAR, New Delhi u Dr. Himanshu Pathak dang shen u la plie paidbah ïa ka jingpule B.Sc. (Hons) Natural Farming Degree programme ha ka jingïalang kaba la long ha College of Agriculture, Central Agricultural University (Imphal), Meghalaya.
Ha kane ka sngi, la plie ruh ïa ka Natural Farming Block hapoh ka Administrative cum Academic Building jon gka College da u Dr. Himanshu Pathak uba la long kum u kongsan.
Haba kren kum u kongsan, u Pathak u la ong ba lada peit katkum ka jingdon ki jaka rep hapoh ka ri India, ka rukom rep tynrai ka long kaba kongsan bha ha ka rep ka riang ïa kaba la pyndonkam da ki nongrep ha baroh kawei ka ri.
Ha ri India, ka Bharatiya Prakritik Krishi Paddhti ka long kum shi bynta ban kyntiew ïa ka rep ka riang, ka jingkynshew ïa ka um, ka jingïada ïa ka khyndew bad ïa ki jaka rep.
Ka Indian Council of Agricultural Research (ICAR) ka la phaikhmat bha sha ka pule ka puthi, ka jingwad bniah ha kaba ïadei bad ka rukom rep tynrai. Ha ka rep ka riang mynta yn ym lah satia ban lait na ka rep tynrai da kaba pyndonkam ïa ki tiar kiba katkum ka juk kaba mynta khnang ba kyntiew ïa ka jingpynmih ïa ki mar rep khlem da pynjulor ïa ka khyndew.
U Dr. Pathak u la ong ruh ba ka jingplie ïa kane ka tnat pule ha kane ka skulbah ka long uwei pat u mawjam na ka bynta ka Central Agricultural University (Imphal) kaba la lah ban pynsdang ïa ka jingpule ha ka Bachelor of Science (Hons.) Natural Farming Degree Programme ha ki san tylli ki kolej.
U la kular ruh ban sa ai ïa ki lad jingïarap sha ka Agriculture, Kyrdemkulai. U la kyntu ruh ïa ki samla pule ba kin buh hakhmat ïa ka thong ba kin dup lah ban shakri ïa ka imlang ka sahlang.
U Vice Chancellor, CAU, Imphal Dr Anupam Mishra, ha ka jingkren pdiang sngewbha ïa ki kynrem ki lyndan, u la pdiang sngewbha ïa ka jingtyrwa jong u Dr. Himanshu Pathak ban ai jingkyrshan ha kaba ïadei bad ka jingwad bniah ha ka rep ka riang hapoh kane ka skulbah. U la ïathuh ruh ba kane ka sienjam ba thymmai ha ka ïadei bad ka jingwanrah ïa ka jingpule ha ka rep tynrai ha ka Undergraduate Level ka dei kaba la thmu lypa da ka ICAR ban pynrung ïa kane ka jingpule ha ka kyrdan Graduate khnang ba ki samla pule kin dup sngewthuh ïa ki buit rep jong ki riew hyndai.
La sakhi lang da u Dr. S. K. Chaudhury, DDG, Natural Resource Management ka ICAR, New Delhi bad kiwei kiwei.
