Mawsynram, Jylliew 11: Ka kynhun Sengbhalang jong ka Mawsynram C&RD Block ka la rai ban pynsangeh noh ïa ka jingleit tur sha Secretariat kaba la thmu ban pynlong kum ka dak jong ka jingpyrshah ïa ka rai jong ka Sorkar ban aiti ha ka SAI Computer Ltd., ïa ka kam ban sam bording elektrik hapoh ka Mawsynram Sub-Division.
Haba kren sha ki lad pathai khubor, u Bah Tyngshain Ronsang u la pyntip ba ka kynhun ka la shim ïa kane ka rai hadien ba ka Sorkar ka la rai ban pynsangeh noh ïa ka SAI Computer Ltd ban trei kam hapoh ka Mawsynram Sub-Division. Na ka liang u Chairman ka kynhun, u la pynpaw ïa ka jingsngewnguh bad jingïaroh sha baroh ki paidbah, ki nongïalam shnong bad ki para sengbhalang, kumjuh ruh ïa ki nongïalam jong ka Central Body, kiba la ai ka jingïatreilang kaba pura bad kaba khlaiñ ha kane ka jingïakhih.
U la kyntu ruh ïa ki paidbah ba kin ym siew ïa ka bill bording elektrik haduh ba ka Meghalaya Power Distribution Corporation Limited (MePDCL) kan wan shimti biang ïa ka jingsam bording hapoh ka Sub-Division.
