Shillong, Naitung, 27: U President jong ka Voice of The People Party (VPP) u Bah Ardent Miller Basaïawmoit ha ka sngi Palei u la pynrem jur ïa ki paidbhur kiba la thombor ïa ka Chief Minister’s Officer, ha Tura ha ka janmiet 24 tarik mynta u bnai katba u Myntri Rangbah ka Jylla u Conrad Kongkal Sangma u dang shong jingïalang bad ki kynhun bapher bapher jong ka rilum Garo kiba dawa ban pyntreikam shadien ïa ka Reservation Policy bad ban pynlong ïa ka nongbah Tura kum ka Winter Capital.
Ha ka jingïakren bad ki lad pathai khubor, u Bah Ardent u la ong, “kane ka dei ka jingjia kaba sngewsih ba kum kine ki jingjia kin jia bad khamtam eh pyrshah ïa u Myntri Rangbah jong ka Jylla. Kam dei satia ban jia kumne. Kamp her la phi pynlong ïa kino ki jingïakhih bad ngam tharai ba kan long kaba dei ba ki nongpynlong ïa ki jingïakhih kin poi haduh u pud kaba lah ban pynmynsaw ïa u Myntri Rangbah.”
Haba kylli, u Bah Ardent u la ong, “halor kane ka jingjia, ka dei ka kamram jong ki Pulit ban pynlong ïa ka jingtohkit khnang ban lap ïa ka daw kaba lam shaduh u pud ban thombor. Ngi hap ban pynrem jur ïa kum kane ka jingjia bad ngim dei ban pynshlur ïa ki samla bad ïa ki paidbah ba kin leh ïa kum ki kam thombor.”
“Ngam lah ban sngewthuh, kaei kaba ngi sngew, lada ki paidbah ki pynlong ïa ki jingïakhih bad watla ngi pynlong makna ïa ki jingïakhih kum ka seng saiñpyrthei bad ki paidbah ki ïashim bynta lang ha ka jingïakhih bad kim shym la wan ha ka kyrteng jong kino kino ki seng saiñpyrthei. Ngam tip ba kumno ka tnat Pulit kan ong ba ki nongthaw jingkulmar kin dei dkhot bad ki nongïalam jong ki seng saiñpyrthei,” la kynthoh u Bah Ardent hadien ba ki Pulit ki kam ba kiba shahkem ha ka jingthombor ïa u Myntri Rangbah ki dei na ki seng saiñpyrthei.
Dang shen, ki don 19 ngut kiba la shah kem kiba kynthup ïa u nongïalam ka TMC u Richard Mrong Marak uba la ïakhun ïa ka elekshon MLA 2023 na South Tura bad u Salseng Ch Momin uba la ïakhun ïa ka elekshon MDC kaba la dep na Siju constituency bad kine ki la shah kem halor ka jingkynnoh ba ki donkti ha ka kam pynhuri hura.
Nalor kane la ithuh ruh ïa ki 26 ngut lyngba ka jinglap ksai na ki video halor ka jingkawang maw bad ka jingthang ïa ki kali.
U Bah Ardent u la ong ruh ba ka don ka jingduna na ka liang jong ka tnat Pulit watla ki la ïoh jingtip ba ki paidbhur kin ïalum ban hiar thma ïa ka Chief Minister’s Officer. “Hadien ba nga la ïohi ïa ka jingkren jong u DGP ba ka dei ka jingïasuhbuit lypa, ha ka jingshisha ki (Pulit) la dei ban khanglad bad ban pynkhlaiñ ïa ka pyrton Pulit ban ym ailad ïa ki paidbhur ba kin thombor.
