Shillong, Naitung, 27: U MP ka Shillong Lok Sabha Constituency u Bah Vincent H. Pala u la pan jingpynshai na u Myntri uba dei khmih ïa ka tnat Fisheries bad Animal Husbandry & Dairying ka Sorkar India u Parshottam Rupala halor ka jingpan at snieh doh kaba saphriang bha ha ki Masi ha ka ri India bad ha ka Jylla Meghalaya.
U Bah Pala u la wanrah ruh ka jingkylli ha ka Dorbar jong ka Parliament, haduh katno tylli ki masi ba la ïap haduh mynta bad ka jinglut jingsep na kane bad ka jingai pisa ïa ki nongri masi na ka bynta ka jinglutksan ha ki jylla bad ha Meghalaya.
Haba ai jubab halor kane, u Parshottam Rupala u la ong, “ka tnat Animal Husbandry and Dairying, Ministry of Fisheries, Animal Husbandry and Dairying, Sorkar India ka tip shaphang ka jingpur jong ka jingpang Lumpy Skin Disease (LSD) ha ka ri. Ka tnat ka dang shim ïa ki sienjam ba donkam ban ai jingkyrshan ïa ki jylla/UT ban tehlakam ïa kane ka jingpang, kaba kynthup ïa ka jingïarap pisa bad ka jingïarap ha ki kam Technical. Ka jingïarap pisa ïa ki jylla/UT ka long katkum ka jingdonkam hapoh ka Assistance to State for Control of Animal Diseases (ASCAD) ban thied ïa ki Dose jong ki dawai tika Goat Pox Vaccine ban ai dawai tika na ka bynta ka jingpang Lumpy Skin Disease (LSD).”
U la ong, “ki kynhun jong ka Sorkar Pdeng ki la leit ruh sha ki jylla/UT ba shah ktah ban ai jingbatai shaphang ki rukom pynbeit ïa kane bad ban ai jingïarap Technical. Ki rukom treikam bad ki jingai jingmut ban tehlakam ïa ka LSD kiba kynthup ïa ka jingai dawai tika, ka jingsumar bad ka jingpeit ki dei kiba la sam sha ki jylla/UT ban pyntreikam ban tehlakam ïa kane ka jingpang da kaba buh ïa ka por. Ka jingpur jong ka jingpang ka dei kaba la tehlakam ha kaba mynta don 6584 tylli ki case kiba dang ïaid shakhmat. Palat 11.57 klur tylli ki mrad ki dei kiba la ïoh dawai tika haduh mynta bad kane ka jingai dawai tika ka dang ïaid shakhmat. Ki jingtip shaphang ka pisa ba la pyllait/mynjur la ai sha ki jylla/UT na ka bynta ki snem 2022-23 bad 2023-24 bad ïa ki jingtip shaphang ka jingai dawai bad ka jingïap ki jingri ha ki jylla la ai ha ka Annexure -1 bad 2.”
“Ka jingïap jong ki masi naduh u Naitung 2022 haduh mynta ka long 200001 ha kaba ka jingantad ïa ka jinglutksan ka long T. 30000/- ïa manla ki masi katkum ki jinglong NDRF. Ka tnat kam don kano kano ka skhim ban ai jingsiew na ka bynta ka jinglutksan ki nongri jingri namar ka jingïap na ka Lumpy Skin Disease (LSD). Katkum ki jingtip ba la ïoh ki jylla Maharashtra, Karnataka ki la ai bai lutksan ïa ki nongrep / nongri jingri kiba la duh ïa ki jingri namar ka LSD. Shuh shuh, kumba la ïoh jingtip na ka tnat Kam Pohiing, ki sorkar jong ki jylla ba shah ktah ki lah ban ai jingïarap na ka State Disaster Response Fund (SDRF) kaba la pynbiang ïa ki katkum ka jingai jingmynjur ka Sorkar India shaphang ki tiar bad ki rukom treikam,” la ïathuh u Rupala.
“Ka kam ri jingri ka hap hapoh ka jingpeit jong ki Sorkar jylla bad ki dawai ba donkam ki don ha ki hospital veterinary/dispensary jong ki jylla/UT. Ym don ka skhim jong ka Sorkar Pdeng kaba pynbiang dawai sha ki jylla/UT ban pynkoit na kum kine ki jingpang. Hynrei, ki tnat Animal Husbandry and Dairying, ka tnat Fisheries, Animal Husbandry and Dairying jong ka Sorkar Pdeng ki la pynkhreh ïa ki rukom ai jingsumar bad ki la sam ïa kine sha ki jylla/UT ban ai jingsumar bad tehlakam ïa ka Lumpy Skin Disease. Haduh mynta la lap ba ka dawai tika goat pox vaccine ka treikam pyrshah ïa u khniang jingpang LSD bad ïa ka pisa ban thied ïa ki dawai tika goat pox la pynbiang ïa ki jylla / UT hapoh ka ASCAD,” la bynrap u Rupala.
La pynbiang ka jingïarap pisa ïa ki jylla/UT katkum ka jingdonkam hapoh ka Assistance to State for Control of Animal Diseases (ASCAD) ban thied ïa ki dawai tika Goat Pox Vaccine ban ai dawai tika pyrshah ïa ka jingpang Lumpy Skin Disease (LSD). Palat 11.57 klur ki jingri ki dei kiba la ïoh dawai tika haduh mynta bad kane ka jingai dawai tika ka dang ïaid shakhmat, ïathuh shuh shuh u Rupala.
