Shillong, Naitung, 27: Ka NPP Women’s Wing hynne ka sngi ka la pynrem jur ïa ki briew kiba donkti ban pynkulmar bad buh jingma ïa ka jingim jong u Myntri Rangbah ka Jylla, Conrad K Sangma katba u dang shong jingïalang bad ki kynhun bapher bapher ha ophis treikam jong u ha Tura.
Haba kren bad ki lad pathai khubor, ka President jong ka NPP Womens Wing, Kong Probity Nongpluh ka la ong, “Ngi pynrem jur ia ka jingjia ha ka 24tarik ia u Myntri Rangbah ka jylla jongngi. Kum ki nongshong shnong ka jylla ngim lah satïa ban pdiang ïa kum kitei ki jingjia kiba long ka jingma ïa ka ri bad ka jaidbynriew hi baroh kawei.”
Nalorkata ka kyntu ruh ia ki samla ba haba ki leit shim bynta ha kino kino ki jingïalang kim dei ban leh shongshit namar hakab khatduh lada don ki jingkulmar ne ki jingjïa ba sngewsih kumba jia ha katei ka jingkulmar ha Tura, dei ka kmie ha iing kaba sngewsih tam.
Katba na ka liang ka Nongaiktien jong ka NPP, Kong D Bani ka la ong ba u Myntri Rangbah u la sngap ïa kaei kaba ki kynhun ki dawa hynrei katta ruh dang don kiba wan ban pynkulmar. “Wat leh ïa kano kano kaba lah pynsngewsih ïa ka jylla bad ruh ïa u Myntri Rangbah hadien habud,” ka la ong.
Lah ban kdew hangne ba san ngut ki bor pahara ki la mynsaw ha katei ka jingkulmar bad ha kajuh ka por na ka liang ki pulit ka jylla pat ki la ïoh ban kem noh palat 20 ngut ki briew kiba suba donkti ha katei ka jingjïa thombor ïa ka ophis u Myntri Rangbah ka Jylla kaba ha Tura, ha ka por ba u dang shong jingïalang bad ki kynhun kiba ïakhih ban dawa ïa ka Winter Capital.
