Ka jingkynthoh ka LRO ka dei ka jingpynkhihwin bad pynbud nam sniew ïa ka Jylla: Paul Lyngdoh

Shillong, Naitung, 27: U Myntri ka Sorkar Jylla u Bah Paul Lyngdoh uba long ruh u nongaiktien jong ka Sorkar ha ka sngi Palei u la pynrem jur ïa ka jingthoh ba la pynmih da ka Legal Rights Observation (LRO) ha ka Twitter ha kaba la kynnoh ba ka jingïakulmar bad ka jingïashoh ïadat ha Mahadev Khola kaba la jia ha ka 24 tarik mynta u bnai ka dei ka jingdonkti da ki dkhot jong ka KSU bad ka kynhun jong ka Balang Presbyterian.
Ha ka jingïakren bad ki lad pathai khubor u Bah Paul Lyngdoh u la ong, “na ka liang jong nga bad kumjuh ruh na ka Sorkar, nga pynrem ïa kane ka jingthoh kaba mih na ka kynhun LRO kaba paw ba ka dei ka jingpyrshang ban pynkhihwin bad ban pynkulmar jingmut ïa ki paidbah bad kumjuh ban pynbudnam sniew ïa ka jylla Meghalaya.”
“Ngi ïohi ba ki jingkynthoh ki long kiba khlem nongrim bad ki bym shongnia bad kiba khlem jingkitkhlieh bad kane ka dei ka jingpyndonkam bakla ïa ka Media khnang ba kin ïoh ban pynkhihwin bad ban pynshongshit ïa ki paidbah jong kiwei pat ki jylla pyrshah ïa ki seng niam bad ïa ki jaidbynriew trai ri jong kane ka jylla jong ngi,” la ong u Bah Paul.
Haba kylli, u Bah Paul u la ong, “na ki kaiphod ba la mih ha ki lad pathai khubor, ki Pulit ki la ïohi ïa kane kaba dei ka kam kaba kham khia bad ka dei ïa ki ban iitbniah bad ban wad bniah bad ban dup lah ban ithuh ïa ki (dkhot ka LRO).