Rai ka Synjuk ki Rangbah Shnong Ri Bhoi District ban mudui sha Meghalaya High Court

Nongpoh, Naitung 27: Ka Synjuk ki Rangbah Shnong Ri Bhoi District (SKRSRBD) mynta ka sngi ki la shim syndon da ka rai rangbah ban ujor noh sha ka ïingbishar ka Meghalaya High Court pyrshah ïa ka sorkar jylla, kaba dei halor ka jingpynslem ban pynlait ïa ka pisa kiba dei na ka bynta ban thied ïa ki tiar ki tar (Material) kiba pyntreikam ïa ka skhim ka sorkar kmie ba la tip kum ka Mahatma Gandhi National Rural Employment Guaranteed Schemes (MGNREGS) lane ka Mahatma Gandhi National Rural Employment Guaranteed Act 2005.
Haba kren sha ki lad pathai Khubor, u General Secretary ka Synjuk ki Rangbah Shnong ka Ri Bhoi, u Bah P.B Sylliang, u la ong ba kum ka synjuk kam banse shuh ban shim da ka rai ban ujor sha ka ïingbishar ka Meghalaya High Court pyrshah ïa ka Sorkar Jylla, halor ka jingleh mynthi ban pyllait noh ïa ka pisa kiba pyntreikam na ka bynta ki skhim bapher bapher jong ka skhim MGNREGS ha Ri Bhoi District.
U la ïathuh ruh kumba long haduh mynta, ki Village Employment Council (VEC) ki hap ban mad ïa ka jingeh ha kaba pyntreikam ïa katei ka skhim ka Sorkar Pdeng bad ka daw ka long ba ka Sorkar ka pyllait tang ïa ka pisa ban siew sha ki Job Card Holder bad katba ïa ka pisa kiba hap ban thied ïa ki tiar ki tar ka la pynsahkut mynta la ar snem kynthih bad kane ka la wanrah ïa ka jingdkoh ha kaba pyntreikam ïa kane ka skhim ka Sorkar Pdeng kaba ai jingmyntoi ym tang ban aikam aijam ïa ki nongshong shnong ha ki shnong nongkyndong, hynrei lada lah ban pyntreikam thikna katkum ka thong jong katei ka skhim ka wan rah ruh shibun ki jingkylla ha ki kam pynroi sha ki shnong Nongkyndong.
“Kane ka skhim kam dei tang kata ka kam pynroi ba wan rah da ka sorkar kmie ban myntoi ki shnong nongkyndong bad ka dei ruh ka aiñ (Act) ha kaba hap bud katkum ki kyndon jong katei ka act, hynrei kaba sngewlyngngoh ka long ba ka sorkar kmie kam pynlait shuh ïa ka pisa kiba bhah na ka bynta ban thied ïa ki tiar ki tiar, ka dei namar ba ka sorkar jylla kam lah ban siew ïa kata ka 10% ba dei ban siew da ka sorkar jylla” ong u Bah P.B Sylliang, bad bynrap ruh dei halor kane ka nongrim mynta la ar snem kynthih ba ka sorkar kam pynlait shuh ïa ka pisa material kaba la wan rah pat ïa kata ka jingdkoh ha kaba pyntreikam ïa kane ka skhim ha kaba wat kito kiba ju kyrshan (Vendor) ban ïarap ïa ki tiar ki tar kim lah shuh ban kyrshan na ka daw ka jingpynsahteng palat ka sorkar ban pynlait ïa kata ka pisa ba la mang ban thied ïa kita ki tiar ki tar haba pyntreikam ïa kane ka skhim” u la bynrap.
U la ong ruh ba ka Synjuk ki Rangbah Shnong Ri Bhoi District ka sngewkhia shisha halor kane ka bynta ba ka sorkar jylla ka la leh sting sha ba palat ban pynlait ïa kata ka pisa Material bad kan myntoi aiu ban shu phah pyntrei ïa ki kam pynroi bapher bapher sha ki shnong bad khlem da pynlait pat ïa kata ka pisa kaba ki hap ban thied ïa ki tiar ki tar ha kaba pyntreikam ïa kane ka skhim.