Nongpoh, Lber 17: Ki paid Garo kiba shong basah ha ka thaiñ rilum Khasi mynta ka sngi ha ka lama jong ka All Khasi Achik Federation (AKHAF) ki la pynrem jur ïa ka KHADC halor ka jingkyntait ban ai bor ïa ki Garo kiba shong basah ha kane ka thaiñ rilum Khasi ban long rangbah shnong bad ki dawa ruh dei ban ailad ïa ki Shnong Garo ba kin don la u jong u Rangbah shnong na ka bynta ban synshar khadar ha ki shnong Garo.
Kane ka jingpynrem ki paidbah Garo lyngba katei ka kynhun seng ka la paw mynta ka sngi ha ka jingïalang ba la pynlong ha Nongspung A ba hap ha Pilangkata Police Outpost bad ïa kane ka jingïalang la lamkhmat da ka Serimina D Marak, kaba dei ka Presdient ka RI Bhoi District Women Wing. Ka Sinita Monin kum ka Vice president, Kleden Sangma kum ka General Secretary bad ba la ïa don lang ruh ki dkhot ka Central Executive Committee ba kynthup ïa u CLiftus Ch Marak kum u President bad u Manuel Ch Marak kum u General secretary.
Ha kane ka jingïalang la wan poi kumba 300 tam ki paid Garo kiba la ïa shong pyrkhat ha kane ka jingïalang bad kiba la shim ïa ka rai ban pynrem jur ïa ka KHADC halor ka jingpynduh long rangbah shnong ïa ki Garo ha u pud u sam ka KHADC.
Haba kren ha kane ka sngi sha ki Nongthoh Khubor, ka Serimina D. Marak bad u Maniel Ch Marak ki la pynrem u jur ïa ka KHADC halor ki aiñ ba la shna bad ba la khanglad ban long rangbah shnong ki Garo hapoh rilum Khasi ba ki Garo kim ioh lad shuh ban long rangbah shnong wat ha ki Shnong ba don tang da ki paid Garo.
Ki la ong ruh ba kane ka jingpynduh long rangbah shnong ïa ki Garo ka la ktah shibun ïa ki paid Garo kiba la shong la sah ha kane ka rilum Khasi naduh hyndai hynthai ba ki la im ha ka shongsuk shongsain, hynrei kane ka jingpynmih hukum ka KHADC ban nym ailad ïa ki Garo ban long rangbah shnong ka la ktah shisha ïa ka hok longbriew man briew ki paid Garo.
Ki la ong ruh ha kane ka jingïalang ba la wan ban shim bynta da ki pad Garo ki la shim ruh ka rai ban dawa na ka KHADC ba ka dei ban weng ïa katei ka kyndon aiñ ban khanglad ban long rangbah shnong ki paid Garo bad ka sorkar jylla ruh ka dei ban shim lem ïa ka jingkitkhleh halor kane ka bynta khnang ba kan nym ktah ïa ka shongsuk shongsain ki paidbah ha kane ka rilum Khasi.
Shuh shuh, kitei ki nongïalam ki paid Garo ki la dawa ruh ïa u Myntri Rangbah ka jylla, u Conrad K. Sangma ba un tuklar ïa kane ka kam bad na ka liang ka All Khasi Hills Achik Federarion ka la ai por ar taiew ban tuklar ïa kane ka kam bad lada kane kam urlong kim banse ban shim pat da kiwei ki lad ki lynti kiba tyngeh, la pynpaw kitei ki nongïalam ki paid Garo.
