Mawkyrwat, Lber 17: Ka ‘National Testing Agency’ (NTA) kan sa pynlong ïa ka Common University Entrance Test (CUET(UG) – 2024 ha ki 13 tylli ki ktien ha kylleng ka ri India khnang ba kan long ka jingïarap na ka bynta ki khun samla ba kin ïoh rung Under Graduate Programme.
Katei ka Under Graduate Programme ka ban long ha ka Hybrid Mode (kaba kyntup ïa ka Computer Based Test (CBT)/Pen & Paper) na ka bynta baroh ki Central Universities (kynthup ïa ka ka NEHU ka long kawei na ki Central University hapoh jylla Meghalaya) bad kiwei kiwei de ki skul bah ne universities ba la pynïasoh hapoh ri na ka bynta u snem 2024 – 2025 khnang ban ïoh ban rung ha ki Under Graduate Courses ha ki kolej ba pynïasoh ba kine ki universities.
Namarkata, kane ka long ka jingpynbna ba donkam na ka bynta ki paid nongshong shnong ka South West Khasi Hills District khamtam na ka bynta ki khynnah skul ki ba shong klas 12, kiba wad admission ha ki Under Graduate Courses.
Ki jingtip ba kham bniah ki samla pule ki lah ban peit lyngba ka https://cuet.samarth.ac.in/index.php/site/index. Ka Tarik ba khatduh ban phah ïa ki phom lyngba ka online application ka dei ha ka 26 tarik u bnai Lber, 2024 haduh 11:50 baje mynmiet.
