Pynrem ka Synjuk ki 10 Dorbar Shnong ïa ka kynthei ba ujor FIR ìa u Secretary Shnong

Shillong, Nailur 3 : Ka Synjuk ki Shiphew (10) Dorbar Shnong kiba hap hapoh 18-West Shillong Constituency ha ka jingïalang kaba kyrkieh kaba la long ha ka 30.8.24 ka la shimkhia bad ïakren bha halor ka jingai FIR jong kawei ka bar jylla pyrshah ïa u Secretary ka Dorbar Shnong Nongsohphoh Upper Mawprem ha kaba ïadei bad ka jingjia ha ka 17.8.24.
Kum ka Synjuk ka pynpaw ka jingpyrshah bad pynrem jur ïa katei ka bar jylla kaba la nud ban pharep bad ka bym kheiñ snep shuh ïa ka Dorbar Shnong bad ha kajuh ka por la kyntu ïa ka sorkar jylla ba kan shim khia ïa kane ka kam khnang ban khang bad ban ym ailad ïa kiba kum kine ki briew kiba ïaleh pyrshah ïa ki jingthmu babha ki Dorbar Shnong.
Ym lah ban len da ka jingdon ki Dorbar Shnong ha man la ki shnong ki thaw ka la pynsuk da shisha ïa ka sorkar jylla ym tang ban wanrah ïa ka roi ka par hynrei kiba peit ruh ïa ka bha ka miat bad ka shongsuk shongsaiñ khamtam ka jingwan rung beaiñ ki bar jylla bad ka jingjyllei u jingdih pynbuaid u Drok. Kumta ka Synjuk ki Shiphew Dorbar Shnong ka kyrmen bad shaniah skhem ha ka sorkar jylla ba kan shim ïa ki lad ki lynti ban ai jingïada ïa ki Dorbar Shnong kiba ju ïatrei lang bad ka sorkar na ka por sha ka por khnang ban rat dyngkhong ïa kum kine ki jait briew kiba thmu ban wanrah ïa ki jingsniew ba har- rukom.