Hun ka Myntri ban ïohi da la ki jong ki khmat ïa ka jingkmen ki Nos na jylla kiba trei ha Japan

Shillong, Nailur 03 : Ka Myntri ka Tnad ka Koit ka Khiah ka Jylla ka Dr Ampareen Lyngdoh, ka la leit da lade ban ïakynduh bad iakren markhmat bad ki samla ka Jylla kiba trei kam nos ha Ri Japan, bad i la dap da ka jingkmen bad hun mynsiem ban lap ba ki lai ngut ki samla Khasi ba la phah da ka sorkar ban trei sha ri Japan ki don hapdeng ka jingkmen bad jingphuh samrkhie ha la ka kam ba ki trei. Kane ka long kum shi bynta ka jingbuddien ïa ka jinglong jingman jong ki hadien ba kila jied ban leit trei ha kane ka Ri.
Ka Myntri kaba la don ha Japan, ha ka sngi Nyngkong, kala leit ïuhkjat hapoh ka Tsurumaki Onsen Hosptal bad ïakynduh ïa lai ngut ki nos ka Jylla nalor u Director jong ka Institute.
Kine ki laingut ki nos ki kyrteng ka samla Shisha Lapyntngen Lartang, Launda B Sangma bad Banniewkor Mukhim. Kine ki dei kiba la ïohkam lyngba ka jingtrei shitom ka Sorkar Jylla bad ka Navic Corporation.
ïa ka Myntri la synran da u Secretary ka Tnad ka Koit ka Khiah Ram Kumar. Ha kane kajuh ka sngi, ka Myntri kala leit ban ïuhkjat sa ha ALIVE Elderly Care Centre bad ïakynduh ïa ki bor pynïaid ban twad jingmut halor ka jingshakri jong ki nos ka Jylla.
Ka Myntri kala ïakynduh ïa u President kane ka jaka sumar bad ïakren halor ka jingkwah jong kane ka jaka sumar ban thung kam biang sa 10 ngut ki nos na Meghalaya.
Kane ka jaka sumar kan sa wan sha Shillong ha ka 17 tarik Nailur kum shibynta jong ka Job Fair ban thungkam ïa ki Nos ki ban leit ai jingshakri sha Japan.
Mynta ka sngi, ka Myntri kan ïakynduh ïa u Ambassador ka India sha Japan ban ïasyllok bad pan ïa ka jingïatreilang nangne shakhmat.
Ha ka 5 tarik Nailur, ka Myntri kan leit sa sha Kurihara-Shi Miyagi Perfectore. Kan leit jngoh ïa ka Mizudori Farm jong ka Yats Corpration Pvt Ltd ban lum jingtip bad jinghikai halor ka kam rep tit shitake.
Kane ka jingleit jngoh ka dei hadien ka Memorandum of Understanding bala ïasoi hapdeng ka Yats Corporation Pvt Ltd bad ka Tnad Agricultre bad ka Hill Farmers Union (HPU) ha u snem 2019 na ka bynta ban rep ïa u tit shitake ka Japan ha Meghalaya.