Kyntiew u MR ïa ka Lama ka Ri 40 meter shajrong 25 klur tyngka pynbna ban pynkylla dur ïa ka Barik

Shillong, Nailur 03 : Mynta ka Sngi Ba Ar u Myntri Rangbah ka Jylla Conrad K Sangma, ula kyntiew bad pynher ïa ka lama lai rong ka Ri ha u narpost ba jrong 40 meter ha Barik Point bad pynbna ïa ka jingthmu ban pynkylla dur ïa ka jaka jong ka Tnad PWD ha Barik, sha ka Unity Park ha ka jingmang pisa ba 25 klur tyngka.
U Myntri Rangbah u la ong, “Mynta ka sngi ka dei ka sngi sah khana, haba ngi pynher ïa ka lama lai rong ka ri kaba jrong bad pynpaw ïa ka plan ba kongsan na ka bynta ban pynkylla dur ïa ka jaka ha Barik”.
“Kane ka projek ka thmu ban pynitynnad bad pynlong ïa ka nongbah Shillong kum ka nongbah kaba jyrngam, ha kaba la antad ban pynlut kumba T.25 klur tyngka. La khmih lynti ba kane ka jingtrei kan sdang ha u bnai Lber ne Nohprah mynta u snem” ula bynrap.
U Myntri Rangbah u la ban jur ba ïa kane ka projek yn pynwandur da kaba buh ha ka jingmut ïa ka jingsngew jong ki paidbah bad ka imlang sahlang, da kaba pynthikna ban ktah tang khyndiat eh bad ban pynneh pynsah ïa ka nam bad ka histori jong ki 9 tylli ki jingtei kiba la rim.
Kane ka Unity Park kan pyni ïa ka jingïatylli jong ka jylla bad ka ri, ka ban pyni ruh ïa ki riti ki dustur bad ki jaitbynriew bapher bapher, kynthup ïa ki Khasi, ki Pnar, ki Garo, ki Bodo bad kiwei kiwei ki jaidbynriew ha ka Jylla, u la ong.
U Conrad ula ong, ka park kan pyni ruh ïa ki jingshna dur kiba pyni ïa ki kolshor bad ki jaitbynriew bapher bapher, kynthup ïa ki kolshor jong kiwei pat ki Jylla bad ka Ri. “Kane ka park kan long kum ka jingpynkynmaw ïa ka jingïatylli hapdeng ki paidbah ka jylla bad ka ri” ula bynrap.
U la ïaroh ïa ka jingïatreilang hapdeng ka tnad Urban Affairs bad ka tnad PWD kaba don bynta ha kane ka projek kaba paw.
U Myntri Rangbah u la pynbna ruh ïa ki jingthmu ban wanrah ïa bun ki project ban pynkylla dur ïa ka nongbah Shillong baroh kawei, da kaba khmih lynti ban lah pyndep hapoh ki 12 bnai ban wan. U la ïai ban ïa ka jingdonkam jong ka jingïatylli, haba kdew ïa ka histori jong ki riewlum ka jylla kiba ïawan lang ban ïakhun Jylla la ka jong bad kyrmen ba ka Unity Park kan long kum ka jingpynkynmaw ïa ka jingdonkam ka jingïatylli mynta bad ha ki por ban wan.
Haba kren ha katei ka jingïalang, u Chief Secretary ka Jylla Bah D. P Wahlang, u la kdew ba kane ka jingkyntiew lama ka ri kan dei lehse kawei na kiba jrong bad heh duh hapoh ka thaiñ Shatei Lam Mihngi ka Ri. U la pynpaw ba ka jingthmu ban pynkylla dur ïa ka Barik complex ka la don ha ka jingthmu bala slem bha hynrei khatduh ka la seisoh hapoh ka jingïohi jngai jong ka Sorkar kaba mynta.
Kane ka projek, kaba la antad ban pynlut haduh 25 klur tyngka, ka kynthup ïa ki katto katne ki bynta ba kongsan. Kine ki kynthup ïa ka jaka ïaid kjat u paidbah, ka madan, ka jaka ïeng taksi bad ka jaka ïeng kali lem bad ka lynti ïaid, ka jaka ïeng kali shimet, ka jaka bam, ka jaka ïalehkai jong ki khynnah, ka jingpynbha bad pyndonkam biang ïa ki 9 ki jingtei bala rim (kiba la palat 100 snem) kum ki Tourist Information Centre, ki dukan die souvenir, cafes, galleries bad ki workshop.
Kiba la iadonlang ha kane ka sngi ki kynthup ïa ki Myntri Sorkar Bah Comingone Ymbon, Abu Taher Mondal bad ki Heh Ophisar ka Jylla.