Shillong, Lber, 18: Ka Meghalaya Film Makers Association (MeFilMA) ka la mih shakhmat ban pynrem jur ïa ka jingpynsaphriang jong uwei u Youtuber ha ka rynsan jong ka Social Media da kaba shim kabu ban phah ong ‘ha u Prah” ïa uwei u khlur ak phlim jong ka Bollywood u Sanjay Mishra tang hapoh khyndiat kynta ba u la wan iuhkjat ha kane ka nongbah Shillong ban ïashim bynta ha ka Film Festival ba la pynlong da ka Meghalaya Film Makers Association naduh ka 14 tarik haduh ka 18 tarik mynta u bnai ha Soso Tham Auditorium, Shillong.
Ha ka jingïakren bad ki lad pathai khubor ha ka Sngi Saitjaiñ u President jong ka MeFilMA u Bah Commander Shangpliang u la pynrem jur halor kane bad ong ba kane ka jingleh jong une u Youtuber ka la long tang ka jingshim kabu bad kaba dei ban pynrem lut da baroh.
“Ha ka jingshisha ka jingkhot jong ngi ïa u Sanjay Mishra ka long ban ai mynsiem ïa ki samla jong ngi kiba don bynta ha ki phlim Khasi bad ïa ki paidbah kiba ju ieid ïa ki phlim hynrei kato ka jingshim kabu jong ki briew ban phah ong (ha u Prah) ïa u ka long shisha kaba ngim shym la poi pyrkhat bad ngim khmihlynti hi ruh. Ki don kiba la pyntip ha u (Sanjay Mishra tang shu saphriang kato ka video) bad kaei kaba ki shu phah ong, u shu ong beit khlem da tip ïa ka jingmut ba shisha,” ong u Bah Commander Shangpliang.
“Um don jingtip eiei shaphag kata, bad nga la ïakren bad u bad ong ruh ba um kwah satia ban wanrah ïa kano kano ka jingsngewthuh bakla bad wat ban pynshai ïa ka jingkren jong u ruh um kwah satia namarba um don hi ruh ka jingkwah leh ïa kata hynrei ka dei tang ka jingshim kabu jong ki briew,” la bynrap u President ka MeFilMA.
“Ka dei tang ka jingjia ka bym shym la poi pyrkhat bad na ka liang jong ngi, ngi shim beit ba kane ka Film Festival ka long tang ka bynta ban ïa kyntiew para ma ngi khnang ba ki nongshna phlim kin dup ïohi namarba ngi la wanrah hangne ïa ki phlim kiba ïoh rah bun tylli ki khusnam,” ong u Bah Shangpliang.
“Tang na ine i jingjia iba rit ngam tharai ba kan don kano kano ka jingrah khubor kaba pynsniewdur ïa kane ka tamasa pyni phlim ka jong ngi,” u la ong.
Haba kylli, u Bah Shangpliang, u la ong, “kane ka long tang ka jingshim kabu bad u (Sanjay Mishra) um bna eiei hi ruh ïa kito ki kyntien (long live VPP bad Ha u Prah). Um tip hi ruh ïa ka jingmut. Lehse ïa ka kyntien Long Live u la lah ban sngewthuh hynrei ïa kata ka VPP un ym tip hi ruh na ka liang jong u. Kata ka dei beit ka jingshim kabu.”
Uto u Youtuber u ladei ban weng noh ïa kato ka Video namarba wat u Sanjay Mishra ruh um sngewtynnat. “Haoid, u (Youtuber) lah ban buh ïa ki interbiw ïa u Sanjay Mishra,” la bynrap u Bah Shangpliang.
