Shillong, Lber 18: U President ka Voice of the People Party (VPP) u Bah Ardent Miller Basaïawmoit ha ka sngi Saitjaiñ
u la ong ba ka VPP kam pat shym la rai satia ïa kino kino ki kyrtong ha kane ka elekshon MDC ne MP kaban wan bad lada don kino kino kiba kam ba ki dei ki kyrtong ka VPP kim dei kiba la ïoh tiket hynrei kiba shu kam hi.
Ha ka jingkren ïa ka jingïalang ka VPP ha Polo u Bah Ardent u ïathuh ba naduh ka sngi jong ka 27 tarik kaba dei ka sngi thep vote namar kiba bun ki ïohi ïa ka jingïoh jigkyrshan ka VPP da ki bun bun ngut ki la phone ban pan tiket Prah hynrei u la ong shai ba ka party kat haduh mynta kam pat rai ïano ban ai tiket MDC.
“Dei namar ki ïohi ba ngi ïoh ka jingkyrshan kaba khraw haduh katta katta ka la pynlong ïa kiba bun ban pan tiket bad ngan ïathuh ïa phi don ki constituency kiba don ym duna ïa ka 20 ngut kiba wan ban pan tiket ban ïakhun ha kane ka elekshon MDC sha KHADC bad JHADC hynrei kum ki nongïalam shaniah ha ngi ba kiba pan tiket ruh ngin ai tang ïa kiba ka party ka la dep ban iit bniah ïa ka jinglong jingim jong ki,” u la ong.
“Nga don ka jingkren biria ba ngin shu pynkhalai nusip lada bun than kiba pan tiket hynrei nga kwah ban kren shai ba kam mut satia ba lada don 20 ngut kiba pan tiket ngin pynkhalai nusip ïa baroh 20 ngut hynrei ngin don shuwa ka qualifying ban jied nadpeng kine ki 20 bad ynda ngi la dep jied ïa kiba kynsai napdeng ki 20 ngut shubuh ki don 2 ngut kiba bit ban ai tiket hangta lehse kan mih ka jingpynkhalai nusip,” u la ong.
U la ong ruh ba na ka liang jong u haba don kino kino kiba kwah ban ïa kynduh ban pan tiket MDC, “Nga ju ong beit da kaba shai lada phi mut ban wan sha ka VPP tang ban ban ïoh tiket bha ba phin ym wan namar kam don satia ka jingthikna la phin ïoh tiket ne em”.
Shuh shuh u la ong ba ka VPP ha kane ka kynti kan pynkhlaiñ shuwa ïa ka party bad ka jingrai ïa ka tiket kan wan kham hadien.
“Ngi ka thung 10 ngut ki Organizing Secretary ba kin peit ïa ki constituency ba ngi pynkhamti khnang ba lyngba jong ki ka jingpynkhaliñ ïa ka party kan tyllun sha khmat,” u la ïathuh.
