Plie ki ar Myntri Rangbahduh ïa ka IBFP ban dang pynklaiñ jingïadei ka India bad Bangladesh

Shillong, Lber 18 : U Myntri Rangbah Duh, u Narendra Modi bad ka Myntri Rangbah Duh ka Bangladesh, ka Sheikh Hasina ki la plie lang ïa ka India-Bangladesh Friendship Pipeline (IBFP) mynta ka sngi lyngba ki lad digital. ïa u maw nongrim ban shna ïa une u pipeline la plie da kine ar ngut ki Myntri Rangbah Duh ha u Nailur 2018.
Ka Numaligarh Refinery Limited ka dei kaba pynkit ïa ki mar petroleum sha Bangladesh naduh u snem 2015. Une u dei u pipeline bording ba ar ba jam ïa u pud jong ka India bad ki ri ba marjan.
Ka jingïatrei lang ha ki kam bording ka dei ka mat ba kongsan ha ka jingïadei ka India bad ka Bangladesh. U IBFP u dei u pipeline bording ba nyngkong ban jam ïa u pud hapdeng ka India bad Bangladesh bad u plie lad ban pynpoi haduh 1 Million Metric Ton Per Annum (MMTPA) ka High-Speed Diesel (HSD) sha Bangladesh.
Ka jingkyntiew ïa ki lad ka leit ka wan bad ka Bangladesh kan pynkhlaiñ shuh shuh ïa ka jingïadei hapdeng kine ar tylli ki ri. Ka Bangladesh ka dei ka paralok kaba ïajan tam bad ka India ha ka roi ka par bad ka paralok kaba ïajan tam ha ki kam khïii ha kane ka thaiñ. Ka jingpyntreikam ïa ka Friendship Pipeline kan nang pynkhlaiñ shuh shuh ïa ka jingïatreilang ha ki kam bording hapdeng kine ar tylli ki ri bad kane kan dang kiew ha Bangladesh, khamtam ha kaba ïadei bad ki kam rep.
U Myntri Rangbah Duh u la ai jingsngewnguh ïa ka Myntri Rangbah Duh, ka Sheikh Hasina kaba la ïalam lynti ha kane ka projek bad u la ong ba u kwah ban bteng ïa ka jingïatreilang bad ka na ka bynta ka bha ka miat ki briew jong kine ki ar tylli ki ri.