Shillong, Lber, 18: Kum shi bynta ban bsut ïa ki samla ïa ka saiñpyrkhat jong u Swami Vivekananda khnang ban pynlong ïa ka lawei jong ka ri India kaba shngaiñ, ka Nehru Yuva Kendra, Shillong, kaba long ka shnat treikam jong ka Ministry of Youth Affairs and Sports ka Sorkar Pdeng ka la pynlong ïa ka Yuva Utsav kaba shi sngi ha East Khasi Hills District ha ka sngi Saitjaiñ.
U MLA jong ka Mawryngkneng Constituency u Bah H.S Kharpran u la long kum u Kongsan ha kane ka sngi.
Ha kane ka Yuva Utsav la pynlong ïa ki jingïakop bapher bapher hapdeng ki samla kaba la long ha Shillong Jail Road Boys’ Higher Secondary School bad ki don haduh 200 ngut ki nongïashim bynta ha ka jingïakop dro, ka jingïakop thoh jingrwai poitri, ka jingïakop ai jingkren bad ka pyninam ïa ka kolshor.
Ha kane ka sngi, ka tnat National Health Mission, Meghalaya, ka State Tuberculosis Office, ka Sports Office, ka DJD, Ministry of Agriculture and Farmers’ Welfare, ka Yuva Art and Craft ki la pyni ïa ki jingtreikam jong ki tnat treikam jong ki ha ka jylla.
U National Youth Volunteer na ka shnong Mawryngkneng u Bah Kynsaibor Kharkongor uba la pynïaid ïa kane ka Yuva Utsav u la ïathuh ba ki san tylli ki thong, ki long ban kyntiew ïa ka ri India, ban weng noh na ka jingmut jingpyrkhat ïa ka shah tehmraw, ban sngew sarong ïa ki jingteinam u menbarim, ban wanrah ïa ka jingïatylli ha ka ri bad ka jingkitkhlieh hapdeng ki nongshong shnong.
