Pynrem jur u Symbud Myntri Rangbah ïa ka jingkren pynshit khlem nongrim u nongïalam ka VPP

Shillong, Nailar 21 : U Nongïalam ka NPP ha ka Jylla ba dei ruh u Symbud Myntri Rangbah ka jylla, Bah Sniawbhalang Dhar ha ka sngi Balang u la pynrem jur ïa ka jingkren jong u President ka VPP, Bah Ardent Miller Basaïawmoit halor ka jingkren ba ka Meghalaya ruh ka donkam ïa ka jingïakhun ban wanrah jingkylla kaba syriem bad ka Bangladesh.
“Nga da pynrem jur ïa kane ka jingkren.Ngi dei ki nongïalam ba don ka jingkitkhlieh ïa ka jylla bad kkum ki nongïalam kadei ka kamram jongngi ban pyntikna ïa ka suk ka saiñ naba ka shongsuk shong shngaiñ ha ka jylla kadei ka mat kaba ngi buh hakhmat eh,” ong u Symbud Myntri Rangbah haba kren bad ki lad pathai khubor.
Shuh shuh u ong ruh ba um tharai ba ki paidbah ka jylla kin sngewtynnad ïa kum kitei ki jingkren ba kin mih na ki nongïalam saiñpyrthei jong ka jylla.
“Nga kyntu ïa ki nongïalam baroh bad ruh ïa ki samla ba kim dei satia ban don kum katei ka rukom pyrkhat. Hynrei to ngin tei ïa ka jylla jongngi. Lada ngi lah, ngi kwah ban rat dyngkhong ïa ka jingkynrei u drok, bad kiwei ki kam bymman. Hynrei ngan ong ba ngi kwah ïa kajuh ka jingïakhun ban wanrah jingkylla kum ha Bangladesh, ngam tip shuh mano kiban kwah ba ka Meghalaya kan kwah ïa kajuh ka jingjia kumba jia ha Bangladesh,” u la ong.