Shillong, Nailar 21 : U National General Secretary ka NPP uba dei ruh u Symbud Myntri Rangbah u ma Sniawbhalang Dhar u la ong mynta ka Sngi Balang ba ki dang don shuh ki MLA kiba la wan twad jingmut na ki nongïalam ka NPP namar ki la kwah ban pynïasoh shapoh ka party.
“ Ki la don katto katne ngut kiba la wan ïamir jingmut bad ngi hynrei mynta ngi dang bishar bniah bha shwa ban pdiang ïa ki tangba khlem pep kin sa don biang ki ban wan pynïasoh sha ka NPP” ong u ma Sniawbha.
Haba la kylli pat u la kyntait ban ïathuh ïa ki kyrteng jong kita ki MLA la ki dei kiba don lang ha ka sorkar ne ki dei kiba na ka Liang Pyrshah ruh namar u la pynpaw ba ka por kan sa batai.
“ Ki don kiba la wan ïa kynduh ïa ngi bad ngin pdiang sngewbha ïa ki lada ki wan ban pynïasoh bad ngi” ong biang u Symbud Myntri Rangbah.
Ki la don san ngut ki MLA kiba la wan ban pynïasoh sha ka NPP hapoh kine ki ar snem kata 2 na ka PDF bad 3 ngut na ka Congress.Kine ki kynthup ïa u bah Gavin Mylliem (Sohra) bad Banteidor Lyngdoh (Mawkynrew) – na ka People’s Democratic Front (PDF) bad lai ngut ki MLA ka Congress kata u bah Gabriel Wahlang (Nongstoin), Charles Marngar (Mawhati) bad Dr Celestine Lyngdoh (Umsning).
Halor ka jingong ba ka NPP ka triem ban khwai ïa ki MLA, u ma Sniawbha u la ong ba kam don kano kano ka jingkhaïi kulai namar ka NPP kam shu thied ne khaïi kulai ïa ki MLA. Kine ki dei kiba la jied da ki paidbah ki dei ki riew donburom bad ki wan pynïasoh hi ym na ka bynta ka shuki ne pisa hynrei ki kwah ïa ka roi ka par hapoh ki constituency jongki namar ki ïohi ba ka sorkar MDA ka dei kaba shakri ïa ki paidbah. Kine ki wan namar ki kwah ban ïoh bun ki kam pynroi namar da kaba don ha ka sorkar ki kham ïoh jingmyntoi bun. Namar ha ka saiñ pyrthei kham kwah bun hi ban ïoh tangba kum ka sorkar pat kam leh kumta ka kwah ban peit ba baroh ki constituency ki dei ban ïa kiew ïa roi lang.
