Shillong, Nailar 21 : Ka Soil and Water Conservation Department jong ka sorkar Jylla ka la pynshna da ka jaka jngohkai kaba itynnad bha kaba don lang bad ka pung dohkha ha ka shnong Mylliem Nongbet lyngba ka projek RIDFXXVII jong u snem 2023-24.
Ïa kane ka jaka ïaid pyngad la plie paidbah ha kane ka sngi Ba-ar da u Chief Adviser jong u Myntri Rangbah ka Jylla ba dei ruh u MLA barim ka Mylliem Bah Hamlet Dohling ryngkat ka jingdonlang u Senior Assistant Soil & Water Conservation Officer, Bah Kerlang Synrem, nangta ki nongïalam shnong bad ruh ki trai jaka.
Kane ka jaka ïaid kai pyngad ba la shna itynnad bha ba la tip kum ka Wah Nongbet, kadei kaba long trai da i Kong Techerlin Sohlang.
Haba kren ha kane ka jingïalang, u Kongsan u la pynpaw ïa ka jingkmen kaba khraw ban ïohi ba ki projek ba u pynïoh ha ka por ba u dang bat kum u Myntri ka tnad Soil & Water Conservation ha ki snem ba la dep ba u dang long kum u MLA, ki la sdang ban pyni mynta ïa u soh bad ai ka jingmyntoi ïa ki paidbah nongshong shnong.
“Tang ha ki arsnem shiteng ba nga bat kum u Myntri ka Soil nga la pynïoh ym duna ïa ka 10 klur tyngka kata tang na ka bynta ka jingmyntoi jong ki paidbah nongshong shnong ka thaiñ Mylliem kaban pynsuk ïa ki nongrep bad kiwei kiwei,” u la ong.
U la ïathuh ba ha ki thain Mylliem ki la lah ban pynjyrngam biang ïa ki lum ba syllen, nangta ban shna ïa ki jaka pynlang um ne ki check dam, ki kynroh bad bun kiwei kiwei kiba la wanrah ka jingmyntoi kaba khraw na bynta ki nongshong shnong.
Haba ïadei pat bad ka projek Wah Nongbet u la ong ba kane kan long ka jingmyntoi kaba khraw khamtam ïa i trai jaka namar kadei ka projek ba la shna kyrpang ban khring ruh ïa ki nongwan jngohkai pyrthei.
“Ki paidbah kiba wan na kylleng kin sa ïohi ïa kane ka projek jong ka Soil. Nga ngeit skhem ba ki projek jong ka sorkar kiba wan lyngba ka Soil kin ai shisha ka jingmyntoi kaba bun ïa ka imlang sahlang,” u la bynrap biang.
Na ka liang u Kongsan u la pyllait paidbah ruh ïa ki dohkha ha kane ka pung, nangta ïa ka lieng kumjuh ruh ban aiti ïa ki life jacket sha ki trai jong katei ka jaka jngohkai.
Ha kajuh ka por, ka Kong Techerlin Sohlang ka la pynpaw ïa ka jingkmen kaba khraw ïa u Bah Hamlet uba la pynïoh ïa katei ka projek kaba heh bad kaba la shna itynnad bha ha ka jaka jong ki.
Ka la ïathuh ruh ba shwa kane katei ka jaka ka twa man ka por kumta ka la leit ban pan jingïarap na u Bah Hamlet kum u MLA. Hynrei la ïathuh ba da ka jingïarap jong u, ka la ïoh ïa katei ka projek na ka Soil kaba la mang ban shna syndon da ka jaka ïaid kai kaba paka nalor ka pung ban ri dohkha.
“Nga khlem poi pyrkhat ba ngan ïoh kat kane ka jaka ba itynnad lyngba kane ka projek ba pynïoh da i Bah Hamlet. Nga don ruh ka jingangnud ba ha kawei ka sngi ngin sa lah ban pynlong ïa kane ka jaka kum kawei na ki jaka jngohkai ba itynnad,” ka la bynrap biang.
Ban poi sha kane ka jaka, don kawei ka lad shaphang kamon harum Mylliem Bah. Kane ka lynti kadei ruh kaba poi sha Mawreng kumjuh sha Mawngap – Mawphlang.
