Ka jingleit pynïasoh NPP u Dr. Bom ka dei ka rai shimet, khlem tip ki nongkyrshan Congress

Nongpoh, Nailar 21: Ka jingmih noh u Dr Celestine Lyngdoh ba ju khot ieid kum u Dr Bom naka party Congress ryngkat 2 ngut kiwei pat ban leit pyniasoh bad ka party NPP kala mih bun ki jingkulmar jingmut hapdeng ki nongïalam ka party bad ki jingkynthoh ruh haka juh ka por naki paidbah ba bun ba lang.
Halor kane ka jingmih noh u Dr Bom naka party Congress ban leit pyniasoh pat bad ka NPP, naka liang ki nongkyrshan jong ka party Congress hapoh ka lama jong ka Umsning Block Congress Committee mynta ka sngi kila khot da ka jingïalang Central Executive Committee ha Umsning bala wan ruh ban shim da ki nongkitkam jong ka party Congress naki area bapher bapher ha Umsning Constituency.
Haba kren sha ki lad pathai khubor naka liang u Bah Rocky Marweiñ President ka Umsning Block Congress Committee (UBCC) haka jingdonlang ki nongkitkam naka UBCC bad District u la ong ba hadien ba u MLA ka Umsning u Dr Celestine Lyngdoh baki paidbah kila pynjop naka party Congress u la leit ban pynïasoh noh ïalade sha ka party NPP, kum ki nongkyrshan ba radbah jong ka party kila lum kyrkieh da ka jingïalang mynta ka sngi ban pynshai paidbah ba katei ka jingleit jong u Dr Bom ban pynïasoh bad ka NPP ka dei ka rai shimet jong u bad ka Umsning Block Congress Committee kam don bynta eiei ruh em halor katei ka jingleit NPP u MLA.
U la ïathuh ruh ba haka 10 tarik Nailar haka Central Executive Committee naka liang u Dr Bom u la pyntip ba un sa leit ban kyrshan ïaka sorkar naka bynta ban wanrah ïaka roi ka par ha Umsning Constituency, namar ban shong haka liang pyrshah kam dei kaba suk ban pyndap pynbiang ïaki paidbah ha Umsning Constituency namar katba buh ki jingkyrpad ban wanrah ki kam pynroi, ym ju ioh satia, hynrei kum ki nongkyrshan ki sah haka umdum bad kim tip shai tad haduh ba u Dr Bom u leit ban pyniasph syndon bad ka NPP.
Ïa kata ka jingthmu jong u Dr Bom ban wanrah ïaka roi ka par lada rung haka party NPP ngim kynthoh hynrei ngi sngewkmen lada u lah ban wanrah shisha ïaka roi ka par hynrei kum ki nongïalam haka party Congress kin nym leit bud satia bad u MLA hynrei kila shim ïaka rai ban dang pynkhlaiñ ïaka party ha Umsning.
Hynrei u la ong pat ba watla u MLA u la leit bad mih noh naka Congress kum ki nongkyrshan ka party Congress ha Umsning kim dei ban rit mynsiem, namar ka Umsning Block Congress ka dang skhem ka dang tylli, bad kan dang ai ka jingshakri ha kine ki sngi ban dang wan ban dang pynkhlaiñ bad pynskhem ïaka party.