Mairang, Nailar 21: Ka lah long shisha ka jingkyrkhu kaba khraw ïa ka thaiñ Mairang bad kumjuh ïaka Eastern West Khasi Hills District hi baroh kawei, ha kaba ka Dr Mazel Ampareen Lyngdoh kaba dei ruh ka Myntri kaba dei peit ïaka tnad ka koit ka khiah ka jylla, ha ryngkat ka jingïadonlang u MLA ka Mairang Constituency u ba dei ruh u Chairman ka Meghalaya State Planing Board u bah Metbah Lyngdoh, mynta ka sngi ka 21 Tarik Nailar ka ïoh ban plie paitbah ïa ka jaka ai jingsumar ïa kiba pang khyllai (kidney) ba la tip kum ka Dialysis ha Tirot Sing Memorial Civil Hospital Mairang.
Katei ka jaka ai jingsumar ïa kito kiba pang khyllai (kidney) ka lah pynsuk bad ïarap shi katdei eh ïa ki nongpang jong katei ka thaiñ kaba kim donkam shuh ban leit sha nongbah Shillong, hynrei ki lah ban ïoh ïaki jingsumar ha katei hi ka Hospital. Bad shibynta ka lah ïarap ruh ïa ki nongshah sumar ha katei ka hospital ka long ba ki lah ban ïoh ei, kim donkam wat ban siew ïa ka pisa haba ki wan ban shah sumar ïa u khyllai (kidney) ne ban leh ïa ka Dialysis ha katei ka hospital.
Ha katei kajuh hi ka sngi, nalor ka jaka leh dialysis la ïoh ruh ban plie paitbah ïa ka labour room ne ka jaka ban pynthiah ïa ki nong kha khyllung kiba shah puid, ka elevator ka ban pynsuk ïa ki nongpang ha ka ban kyntiew ne ban rah ïa ki nongpang, ka untra sound room ne ka kamra skaning bad ka private room ne ka kamra shimet kaba kitei ki lah pynsuk shi katdei eh ïa ki paitbah nong shah sumar ha katei ha hospital.
ïa katei ka jaka ai jingsumar ba la ïoh ban plie ha katei ka sngi ka dei ba lah mang lyngba ka Hans Renal Care Centre kaba hap ha ka Pradhan Mantri National Dialysis Program, kaba ki ju leh baroh kylleng ka ri ban ai ïa ki jingsumar ei na ka bynta kito kiba ïoh ïa ka jingpang khyllai.
Bad ha shwa ban plie ïa katei ka jaka ai jingsumar la ïoh ban pynlong shwa ïa ka jingïalang kaba lyngkot ha conference hall jong katei ka hospital
Na ka liang u secretary ka shnong Sang Shong haba ai jingkren ha katei ka sngi u la ïathuh ba katei ka hospital ka lah ai ka jingshakri ym tang ïa ki paidbah jong katei ka district hynrei wat ïa kiba na shabar jong katei ka district ba kynthup ïa ki 5 tylli ki district kita ki long ka East Khasi Hills District, West Khasi Hills District, South West Khasi Hills District, Eastern West Khasi Hills District bad Ri Bhoi District.
Na ka liang jong u bah Metbah haba ai jingkren ha katei ka jingïalang u la ai ka jingïaroh ïa ki nongpynïaid jong katei ka hospital ba dei lyngba ka jingtreishitom bad ka jinglah ka jong ki ban pyntyllun ïa ka kam ba ki lah ïoh ban plie noh ïa katei ka jaka ai jingsumar ha katei ka hospital.
Bad na ka liang ka kong Ampareen ka la ïathuh ba na ka liang ka sorkar jylla ka thmu ban rah ïa ka Dialysis centre ne ka jaka ai jingsumar na ka bynta ki ba pang khyllai sha baroh ki district jong ka jylla ka ban pynsuk ban ïoh ïa ki jingsumar ba ym donkam shuh ban da leit sha kiwei pat ki jaka.
Nalor ka Dr Mazel Ampareen Lyngdoh bad u bah Metbah Lyngdoh la don ban ïa sakhi lang da u medical superintendent u Dr. Lyngdoh, DHS ka Dr. F. V. Kharshiing, DC ka ka Eastern West Khasi Hills District u bah G. Kharmawphlang, u bah Batskhem Ryntathiang MDC ka Mairang Constituency, u bah J Nongrang secratary shnong Sangshong, Sr. Regional Manager, HANS Foundation u Krishna lem bad ki heh ophisar ka Eastern West Khasi Hills District, ki dkhot jong ka HANS Foundation, ki staff ka Tirot Sing Memorial Civil Hospital bad kiwei kiwei.
