Khliehriat, Nailar, 21: Uwei u khynnah uba dang hapoh 15 snem ka rta na East Jaiñtia Hills District ha ka sngi Balang u la panmap na ki khynnah kynthei bad na ki bahaïing hasem ki jong ki namar ka jingpyndonkam bakla jong u ïa ki durkhih (video) kiba u la pyllait paidbah ha ka Facebook Page jong u.
U la pynpaw ruh ka jingbabe bad panmap halor kane ka jingbakla jong u.
Ha ka jingïakren bad ki lad pathai khubor une u khynnah u la kam da kaba ong, “ka dei tang ka jingbakla jong nga hi ha kaba nga la shna (edit) ïa ka dur khih (video) bad pynsaphriang da kaba thep ha ka Facebook Page jong nga. Ha ka jingshisa ki khynnah ba la paw ha ka Video kim dei kita kiba dakhaid kumba nga la kynnoh. Kumta nga panmap na phi bad na ki bahaïing hasem jong ki baroh. Nga panmap kyrpang eh na kato ka khynnah kaba dei ka trai jong ka Video kaba nga la pyndonkam bakla bad shna (edit) khlemakor bad kren bakla ruh ha ka Video ba nga la buh ha Facebook.”
U mama jong une u khynnah, u Bah M. Lamurong, u la panmap na ki bahaïing hasem jong ka khynnah kynthei bad kumjuh ruh na ki khynnah kynthei kiba la shah pyndonkam bakla ha ka Video jong ki bad u la ong ruh ba ka la don ka jingïamab lang na baroh arliang.
U khynnah bad u Mama lem bad ki bahaïing hasem ki la kyrpad ïa ki paidbah ba kin sngewbha ban pyndam noh ïa ka video bad ban ym pynsashriang shuh bad lada lap ba don kiba dang pynsaphriang ïa ka video na ka liang jong ki kin leh da kaba tyngeh.
Kumba la paw ha ka video ba la pynsaphriang, ki don bun ngut ki khynnah kynthei kiba dang ïakmen ïa sngewbha shiparalok bad ring dur ruh bad buh ha ka Facebook Page hynrei u khynnah uba dang hapoh 15 snem ka rta u la shim ïa ka video jong ki nangta u la shna (edit) ruh bad kren khlemakor ruh ïa ki halor ka video jong ki bad pynmih ha ka Facebook Page jong u bad kynthoh ruh ba kine ki khynnah kynthei ki dei kiba dakaid bha bad bad ki jingkynnoh ba laitphew jait.
Ki bahaïing jong ki khynnah kynthei ki la dawa ïa u khynnah ba u dei ban panmap ha ka Social Media kumba u la thad burom ïa ki.
Na ka liang jong ki bahaïing hasem jong ka khynnah kaba shah pyndonkam bakla ïa ka Video lyngba u J. Dkhar u la ong, “nga kum u para jong ka khynnah kaba la shah pynkhlemraiñ ha Social Media kumba ki ladep panmap ngam kwah shuh ban don kano kano ka jingïabuhnud para shnong para thaw bad ngi la ïamab.”
“Ha ka jingshisha nga sngewsih bha ïa kane ka jingleh jong une u khynnah hynrei watla katta ruh ngi la ïamab kumba u la panmab. Ha kaba ïadei bad kane ka video nga kyrpad ïa ki paidbah kiba la ïohi ne peit ïa ka video ba kim dei ban mutdur sniew eiei namarba kane ka video kam dei kaba shisha hynrei ka dei tang ka pynthohbria jong u khynnah uba la shu shna hi (edit) ïa ka video. Nga kyrpad ïa ki paidbah ba kin sngewbha ban weng noh ïa ka video namarba kane ka ktah ïa ka burom jong ka ïing ka sem jong ngi bad ïa ka shnong ka thaw bad nga ngeit ba kaba kum kane kan ym jia shuh nangne shakhmat,” la kyrpad u J. Dkhar.
