U Bah Pala u la shu kren laplah bad kynnoh khlem nongrim ïa ka NPP: Hamlet

Shillong, Nailar 21 : U Working President ka NPP u bah Hamletson Dohling u la ther tyngeh ïa u nongïalam ka Congress u ma Vincent H Pala da kaba u la ong ba kum u nongïalam u la shu kren lap lah khlem da pyrkhat jngai bad u la shu kynnoh khlem nongrim ïa ka NPP.
“ Ban shu kynnoh ba ka NPP ka pyndonkam da ka pisa beaiñ na kaba khaïi drok bad khaïi dewiong beaiñ ban thied MLA ka dei kaba la shu kren laplah khlem da pynshong nongrim satia. Kat u nongïalam ka MPCC ngam shym la poi pyrkhat ba kum kitei ki kyntien kin mih na u. Ka dei ka jingren iam rem namar um lah ban synshar bad sumar wat tang ïa ka ïing ka sem la jong ruh. Dei na kane ka daw ba ki 3 ngut ki MLA ka Congress ki la phet bad wan pynïasoh bad ngi ka NPP” ong u bah Hamlet.
U la ong shuh shuh “ Ban shu kynnoh ba ngi pyndonkam da ka pisa ban thied ïa kitei ki MLA ka long ka bym don nongrim ha ei ha ei ruh namar kitei ki lai ngut ki la wan rung sha ka NPP namar ki kwah ban ïoh kham bun ki skhim bad projek na ka bynta ki constituency jongki ym dei ba ki kwah myntoi shimet namar ki la dep kren shai naduh kaba sdang ba kim kwah shuki hynrei ki kwah ïa ki kam pynroi pynpar”.
“ Kumta nga pynrem jur ïa kiba kum kine ki jingkren ba kat u MP ba rim ba la jop lai sien bad kat uta u nongïalam jongka Congres u kren tang ban lait jynhaw bad kum u khynnah rit ba shu kren ruma rutit khlem da pynshong nongrim. U la ïohi katne ka sorkar ka ïakhun pyrshah ban rat dyngkong ïa u drok bad ban thaw ruh ïa kiba bun ki rehabilitation centre ban sumar ïa kiba la ngop hynrei u dang nud ban kynnoh ba ka ïadon kti pynban ban ïa khaïi drok, hato kane kam dei kaba shu kren lap lah bad khlem nongrim. Ju don kata ka sorkar kaba ïadon kti ban khaïi drok ne pynjot ïa ki khun samla? ïoh lehse don kti ma u bad ki briew jongu ba u sa kynnoh pynban ïa ka sorkar ong u bah Hamlet.