Pynrem jur u nongïalam ka JNC ïa ki kynhun ba pynshlur ban ai jait sha u kpa

Khliehriat nohprah 30: Kum ka jingkynmaw burom ïa ka sngi iap kaba 161 jong u khla wait ka ri, u woh Kiang Nangbah, ka Jaiñtia National Council hapoh ka jingïalam u President rangbah, u bah Sambormi Lyngdoh ka la leit ban buh syntiew ha u mot jong u Kiang Nagbah ha Khliehriat bad la pynlong ruh ïa ka jingïalang kaba lyngkot ha Khliehriat ha trai jong u mot.
Haba kren ha ka jingïalang, u bah Sambormi Lyngdoh u la ong ba ki la don mynta ki kynhun kiba la mih bad ki ba thmu ban ialam bakla ïa ka jaitbynriew da kaba ong ba ka la dei ka por ban ai jait noh sha u kpa, halor kane utei u nongialam u pynrem jur ïa kaba kum kane ka jing ong jong ki kynhun bad u la ong ruh ba ka seng hi kan nym ai lad ïa kum kine ki kynhun kiba thmu ban pyniapher ïa kaei kaba u barim u la hikai.
Ha kaba iadei bad kane ka sngi iap u Kiang Nangbah tei u nongialam ka JNC u la ong bad pyn kynmaw ba “Ka kmie Jong u Woh Kiang Nangbah kadei ka Rimai Nangbah bad la sngewthuh lypa ba naduh ki por mynshwa ruh la hikai ba ka jait hi ngi ai sha la ka kmie kumta wat juh pyrshang ban ialam bakla tang naka bynta ki jingmyntoi shimet jongno re jongno”
Ha kajuh ka por, u bah Sambormi Lyngdoh u la pynpaw ba kum ka seng ka pyrsah jur ruh ïa ka jingthmu ka sorkar ban wanrah ïa ka lynti rel ha East Jaiñtia Hills District bad kynthoh ruh kane ka wanrah jingmyntoi tang ïa ki company kum ka Star Cement, ka Dalmia, ka Topcem bad ka COSMOS “Ngim donkam lynti rel, lada ngi leit da ka kali shaduh Assam ruh ruh ngi dang poi hi, ngi donkam ïa ki lad jingiada bad da kiwei pat ki lad bapher bapher, ban kyntiew ïa ka roi ka par, u nongmihkhmat uba dei ruh u myntri sorkar, u bah Kyrmen shylla u la ong ba kan sa don da ka jingïalang paidbah bad ban sngap ïa ka sur jong u paidbah ha kaba iadei ban ka jingwan ka lynti rel, balei yn dang donkam ïa kata ka jingpysngew paidbah?
U la ong ruh ba “lada wan ka lynti rel kan wanrah jingmyntoi tang ïa kiba na bar bad kane ka ap jingma kaba khraw ïa ngi ki trai ri trai muluk, u Blei u la kyrkhu ïa ngi da ka jingdon ki lum ki wah, ki mar pohkhyndew bapher bapher hynrei sngewsih ban ong ba kane ka wanrah jingmyntoi pynban tang ïa kito kiba na bar ka jylla, ka UDP ka la kren shai ba ka kloi ban pdiang ïa ka lynti rel namar ba ka dei tang ka rel ba kit ïa ki mar, la sngewthuh ba kane kan wanrah jingmyntoi tang ïa kitei ki company kiba dei ruh ki karkhana dewbilat”
Kum u nongïalam u kyntu ïa ki dkhot kumjuh ruh ïa ki paidbah ba ki dei ban da bishar bha ïa kane ka jingthmu ka sorkar ioh kan wanrah pynban ïa ka jing babe hadien habud, ioh long kum ki karkhana coke namar ha ka por ba wan ki coke, ki sengbhalang ki la ieng pyrshah hynrei ki paidbah kim kyrshan bad ki paidbah ki la shah ialam bakla hano re hano, hynrei dei tat ynda ki la mad ïa ki jingeh ha ka jingmih ka tdem ba jakhlia, ka lyer ba jakhlia hangta ki paidbah kin sa kyndit bynreiw, “Kyrmen skhem ba ha kane ka jingthmu ka sorkar ban wanrah ïa ka lynti rel ki paidbah kin kyndit bynriew bad ka khubor kaba shai ngi phah sha ka sorkar ba ka JNC hi da lei lei ka ieng pyrshah jur ïa ka lynti rel, kum ki nongialam bad ki dkhot ngi long la kloi ban ieng pyrshah bad ngi la pynkhreh ruh ban ieng ialeh na ka bynta ka jingshngaiñ ka lawei jong ka pateng ka ban wan”
Kiba la ïa don ryngkat lang ha kane ka sngi, ki kynthup u Vice President, u bah Nangjan Dkhar bad u bah Ency Shadap, General Secretary, u bah Wanshwa Suting, Publicity Secretary, u bah Mebanteilang Sukhlian bad kiwei kiwei.