Pynrem jur u Bah Alan ba shah thombor ki nongtrei jong ka Centrepoint Group ha Laitkynsew

Shillong, Jymmang 29: U Bah Alan West u la ong ba u pynrem jur ïa ka jingjia ba sngew kyndit halor jingthombor kaba la jia ha ka sngi Palei ha ka jaka shimet kaba dang shna mynta ïa ka kynja resort jong ka Centrepoint Group ha ka shnong Laitkynsiew ha kaba kila don ki briew kiba la leit ban shoh ban dat ïa kiba trei ha katei ka jaka.
Kum kine ki jait jingshah pynsheptieng, ka jingshah shoh bad ka jingshah pynbor, kim don jaka satia ha ka imlang sahlang kaba tip briew bad kaba kiew khrong. Kane ka jingshah thombor kaba la jia ïa ki nongtrei, ka la lam sha ka jingmynsaw jong uwei u mistri uba mynta u dang shah sumar ïalade, ha kaba katei ka long kaba pynkulmar jingmut bad kaba ym lah ban pdiang.
Ka jylla Meghalaya ïa kaba la tip ne bna kum ka jaka kaba don ïa ka jingsngewtynnat, ka jingpdiang sngewbha, ka jingim lang kaba suk, bad ka jingïohi jngai kaba kiew shaphrang. Ka jingpyrshrang jong ki briew ne ki kynhun ban shoh, ban pynthut ïa ki kam pynroi kiba shai, ne ban pyntieng ïa ki nongkhaïi bad ki nongtrei, kam dei tang ka jingshoh ïa ka seng shimet, hynrei ka long ruh ka jingshoh ïa ka jingdonkam ba kongsan jong ka jylla bad u paidbah.
Ka Centrepoint Group ka dei ka kynhun kaba la noh synniang shibun eh sha ka jingkyntiew ïa ka kam jngohkai pyrthei, ka pynlong kam ka plie ïa ka lad kamai jakpoh, ka tei pynbha ïa ki nongrim shnong ka roi ka par ha ki liang ka pynïaid bad ka roi ka par ha ka ïoh ka kot ha ka jylla Meghalaya.
Ha ka por ba ka jylla ka pyrshang ban pdiang ïa ki nongbei pisa ba kiba kitkhlieh bad ban pynlong lad ïa ki samla, kine ki jingjia pyntriem ki phah ïa ka khubor kaba sniew bad kaba pynmynsaw ïa kiba wan ban bei pisa ha ki kam ki jam, ki nongleit jngohkai, ki nongshna nongtei, bad ïa ka ri baroh kawei.
“Kum u President jong ka MRTF bad kum u briew uba ïadei bha bad ka kam jngohkai pyrthei, nga kwah ban pynhusiar ba lada kum kine ki kam pyntriem bad shyrkhei la shah ban bteng khlem da pyrkhing, kin thaw ïa ka nuksa kaba shyrkhei kaba lah ban pynduhjait jur bad pyn budnam ïa ka kyrteng jong ka jylla Meghalaya, ka ïoh ka kot bad kiwei kiwei ki kam pynroi,” ula ong.
Ym don kano kano ka kynhun, ka seng ne u riew shimet uba lah ban shim ïa ka ain ha ka kti jong u. Ka jingïapher, lada don, dei ban pynbeit da ki lad ki lynti kiba shong aiñ bad ki jong ka synshar paidbah.
“Nga kyrpad ïa ki pulit ka jylla Meghalaya bad ka sorkar jylla ba kan tohkit mar mar ïa katei ka jingjia bad ban pynshitom katkum ka aiñ ïa kiba leh jubor khlem da pynïapher ïa ka seng ne ka niam. Ka aiñ ka dei ban long ka kaba hakhlieh duh, bad ka shongsuk-shongshngaiñ, ka jingshngaiñ jong ki nongtrei, ki nongwankai, ki nongshna-kam, bad ki jaka treikam hapoh ka jylla dei ban pynthikna ha kano kano ka por. Nga kyrpad ïa baroh ki nongshong shnong ba don ka jingkitkhlieh, ki nongïalam ïa ka imlang ka sahlang bad ki kynhun bapher bapher ba kin ïa don bynta lang ban pynrem ïa katei ka kam pyntriem bad ba shyrkhei. Ka roi ka par ha ka jylla Meghalaya kan lah ban tei lyngba ka jingïasuk, ïa tainia, ka jingburom iwei ïa iwei bad ka jingïatreilang kaba tei.
U la ong ba ym dei ban shah ba ki katto katne ki briew kiba bakla lynti kin pynjot ïa ka nam kaba la dep wad thma da ka jingshitom bad ïa ki jingthmu kiba phyrnai na ka bynta ka lawei jong ka jylla.