Shillong, Jylliew 11: Ka North East Students’ Organisation (NESO) kala pynrem jur halor ka jingpyniap ïa ki hynriew ngut ki shynrang Naga kiba dei na Konsakhul Naga Village ha Manipur, ïa kaba la lap ïa ki dkhot met jong ki ha ka 10 tarik Jylliew, jan shi bnai hadien ba ki la shah rahbor na shnong Leilom Vaiphei, kaba la jia ha ka 13 tarik Jymmang 2026.
Ha ka kyrwoh khubor ba la pyllait da u Chairman ka NESO u Bah Samuel B Jyrwa bad u Mutsikhoyo Yhobu uba dei u Secretary General ka NESO kila ong, “Ka NESO ka ong ba kane ka rukom leh ba tohmet bha ka pyni ïa ka jingbym don shuh ka jingiatip para briew bad ba kane ka jingjia kala pynkyndit ïa ka jingsngew jong ka thain baroh kawei, kaba long kum ka jingpynkynmaw ïa ka jingnang sniew ka jinglong jingman ha Manipur”.
Haba pynpaw ïa ka jingsngewlem sha ki longïing ba shem ïa kane ka apot bad ki briew jong ka Konsakhul Naga, ka NESO ka ong baka ïeng ha syndah bad kito kiba la shah knieh jynthet ïala ki baieid bathoiñ ha kane ka kam kaba shyrkhei bad ba khlem ka jingpyrkhat.
Ka NESO ka dawa ban don ka jingtohkit ba mardor, kaba shai bad ka bym shah liang halor kane ka kam bymman ba shyrkhei, bad ong ba man ki briew kiba donkti, kampher ïa ka jingdon jingiadei badno badno ne don kyrdan, dei ban ithuh, kem bad pynshitom bad ban bishar hok khlem ka jingpynslem.
Shuh shuh ka NESO kala maham ba ka jingbym leh eiei kan nang pynshlur shuh shuh ïa kine ki briew ba kin leh ïa kum kane ka kam khlem ka jingsheptieng ïa ki jingpynshitom.
Ka NESO kala pynpaw ba ha kine ki lai snem bala leit, kala ïai ïalap halor ka jingsuk, ka jingïakren sngewthuh bad ka jingïasuk ha Manipur bad ïai kyrpad ïa baroh ki kynhun ba don bynta bad ki bor khmih ba kin ïada ïa ki nongshongshnong bad ban shim ïa ki sienjam kiba khlain ban pynkut ïa ka jingïaum snam mar kylliang.
Haba buh jingkylli ïa ka Sorkar India, ka NESO kala kylli ba kumno ka lah ban long ba hadien palat lai snem jong ka jingïakynad bad ka jingbuh bun ki bor pahara, ym pat don uwei ruh u nongshah kynnoh ha kine ki jingpynïap briew bym lah ban niew shuh, ki jingrahbor, jingthang ïing bad ki kam rukom kiba la shah pynngat ha ki kyndon aiñ.
Kala pynpaw ruh ïa ka jingsngewkhia kaba jur halor ka jingkynnoh ba shah liang ki bor ka Sorkar Pdeng, haba pynpaw ba kino kino ki jingïadon bynta lang ban leh ïa ki kam bymman, ka jingkhein sting, ka jingïasuhbuit lane leh shiliang da ki bor pahara ban pynneh ïa ka suk ka sain bad ïada ïa ki nongshongshnong, ka dei ka jingshet kylla kaba shyrkhei ïa ka jingshaniah u paidbah bad ka dei ban ngat ha ki jingpynshitom kat kum ka ain.
Ka NESO ka ban biang ba ka jingsuk kaba neh ha Manipur ka lah ban wan tang lyngba ka jingbishar hok, ka jingtynrong ïa ka jingkitkhlieh bad ka jingai jingïada ba mar katjuh ïa baroh ki Jaidbynriew.
Ka NESO kala dawa ïa ka Sorkar India ban shim ïa ki seinjam kiba shai ha kaban wanrah pat ïa ka jingshaniah na ki paidbah, pynthikna ïa ka jingshngain jong baroh ki nongshongshnong bad ban pynkut noh ïa ka dustur ban shu map kaba aiding ïa ki kam umsnam.
