Pynrem jur ka KJP ïa ka jingjia ha Mukroh, kyntu ban tehlakam ïa ka suk ka saiñ

Shillong, Naiwieng 30 : Ka Working Committee jong ka Khasi Jaiñtia Presbyterian Assembly ka la pynrem jur halor ka jingjia ha Mukroh kaba la poi haduh u pud ba san ngut ki briew ki la duhei ïa la ka jingim ba kordor ha ka jingsiat pathar da ki pulit Assam.
Katkum ka kyrwoh, ka KJPA haba phah ïa ka kyrwoh sngewlem, ka la ong ba ki pynrem jur ïa ka jingpyndonkam bakla ïa ki tiar siat ha ki briew kiba lui lui ryngkat ka jingkyntu ba kum kitei ki jingjia kim dei shuh ban jia ha ki por ban wan.
“Ban kyrpad ïa ka jingshong suk hapdeng ki nongshong shnong bad ban tehlakam ïa kino kion ki jingïakhih kiba ktah ïa ka suk ka saiñ ha ka jylla baroh kawei,” ong ka kyrwoh.
Nalorkata, ka KJPA ka kyntu ruh ïa ki bor sorkar ban pynstet ïa ka jingwad tohkit khnang ban ai ka jingpynsaja ïa kiba donkti katkum ki kyndon ka ain bad ban wanrah noh shi syndon ïa ka jingia pynbeit kaba paka ha ki jaka khappud kaba la pynmih ïa ka jingia umsnam na ka por sha ka por.
Kane ka long katkum ka kyrwoh ba la phah da u Moderator ka Assembly, Rev D Rymbai.