Shillong, Naiwieng,30: Ka United Democratic Party (UDP) ha ka sngi Balang ka la kynthoh kylla ïa ka Bharatiya Janata Party (BJP) ba ka dei ban ba ka dei ban tuklar tang ïa la ka jong ka ing ka sem.
“Nga don tang kane ban ong ba u dei ban pynleit jingmut tang ïa ki kam jong ka party lajong,” ong u Vice President ka UDP u Bah Allantry F. Dkhar ha ka jingïakren bad ki lad pathai khubor haba kynthoh kylla ïa ka jingdawa hiar shuki jong u National Secretary ka BJP u Rituraj Sinha ïa u Myntri ka tnat Kam Pohïing u Bah Lahkmen Rymbui da kaba ong ba um shym la lah ban ïada ïa ka jingim jong ki paidbah kiba sah ha khappud hadien ka jingjia ha ka shnong Mukroh.
“Ngi don bun tylli ki sakhi sabut ban pynshisha ba ka party jong ki lada ka bat ïa ka bor synshar ha UP, ha Gujarat, ki bun ki jingjia kiba la dkhat jubor wat ïa ka jingim brirew hynrei haei ngin ïohi ba u Myntri Kam Pohing jong ka party jong ki un hiar shuki,” ong u Bah Dkhar.
Haba kylli, u Bah Dkhar u la ong, um lah ban satia ban buh jingkylli ïa ka jingshemphang jong u Myntri Rangbah la yn pynhiar shuki ïa uno uno u Myntri Sorkar. “U (Myntri Rangbah) dei uba la shah pynkup bor ban pynïaid ïa ka synshar bad ngi ieh ha ka jingshemphang jong u,” u la bynrap.
Halor kawei pat ka jingkylli, u Bah Dkhar, u la ong ba ka jingjia ha ka shnong Mukroh ka dei kaba la tip ruh da u Myntri Rangbah ka Jylla Asam bad kane ka paw shai ba ka dei ka jingrung jubor jong ki Pulit na kawei ka Jylla sha ka jylla jong ngi kaba long be-aiñ haduh katta katta bad ka jingïai bteng ban thombor ha khappud.
Haba ïaroh ïa ka rai jong ka Kynhun Myntri ban buh ïa ki Border Outposts (BOP) ha ki jaka ba don ki jingïakajia ha khappud, u Bah Dkhar u la ong, “nga sngewkmen haduh katta katta ïa ka Sorkar kaba la rai ban buh 7 tylli ki Border Outposts bad ban kyntiew kyrdan ïa ki Border Out Post sha ki Police Station.”
“Kum kine ki rai, ki dei kiba la donkam bha nalor ba ka UDP ka ladep ai jingmut ba dei ban buh ïa ki ktem pulit ha shilynter ka khappud khnang ban ai jingïada ïa ki nongshong shnong,” u la bynrap.
Haba pynkynmaw ïa ka jingïalang jong ki sengsaiñ pyrthei ba dang shu dep long shen, u MLA ka UDP na Mookaïaw u Bah Nujorki Sungoh u la ai jingmut ba ka jingai jingïarap ba tang shisien kan ym ïarap satia ïa ki bahaing hasem jong ki san ngut kiba la shah siat ïap hynrei la kumno kumno dei ban aikam sorkar ïa uwei u dkhot na ka longing jong ki san ngut ki lanot ïa kaba ka Sorkar kan dang hap ban pyrkhat sani bha.
“Nalor kata, ka jingdon jong ki Pulit ka jylla Meghalaya kan pynshngaiñ ïa ki paidbah bad kan wanrah biang ïa ka shongsuk shongsaiñ,” ula ong.
Da kaba pynpaw ïa ka jingbym mynjur ïa ka jingdawa jong ka All India Trinamool Congress ban pynjari da ka jingsynshar President ha Meghalaya, u Bah Dkhar u la ong, “ka jingsynjor jong ka shongsuk shongsaiñ ka lah ban jia na ka por sha ka por hynrei haba ka Sorkar ka lah ban wanrah biang ïa ka shongsuk shongsaiñ, ban shimkhia ïa ki jingkulmar, balei ynda donkam ban pynjari ïa ka jingsynshar President. Namarkata, ngam sngewïahap eiei ruh em.”
