Lada ngi ïohkam pulit ngi long kiba la kloi ban leit sha khappud ruh ong ki samla wad kam pulit

Shllong, Naiwieng 30: Ki samla kiba thep kam pulit kiba ïalum ha khmat ka ophis treikam jong ka Meghalaya Board of School and Education ban dawa na ka sorkar kan pynbna noh ïa ka resol jong ka Written Test kaba ki la dep ïakhun ha ki bnai sdang jong une u snem ki la ong ba lada ka sorkar ka pynlong noh ka jingpynrung kam ïa ki bad kan phah pahara sha ki khappud ruh na ka liang jong ki ki long kiba la kloi khlem jingkhohñioh.
Haba kren sha ki lad pathai khubor uwei na ki samla ba wad kam pulit u la ong ba na ka liang jong ki ki ïathuh ba lada ka sorkar ka pynsted noh ïa ka jingthungkam bad lada dei ba ki ïoh rung kim don jingsalia ban leit pahara sha ki khappud ban trei hok ïa ka kam kat kum ka jingdawa jong ka kam wat lada dei ban tur sha ka thma ruh..
U la pynpaw ruh ba na ka liang jong ki ki don hapdeng ka jingsngew dukha mynsiem namar ka jingbym pynmih shuh ka sorkar ïa kane ka resol wat hadien da ki bun bun bnai ba ki ïakhun ïa ka eksamin.
“Ngi kwah ban kren da kaba shai sha ka sorkar khamtam eh sha u myntri kam poh iing ba ka tnat ka dei ban pyllait noh ïa ka resol ha une u bnai Nohprah bad lada kam long kumta na ka liang jong ngi ngin mih paidbah noh ban dawa ïa la ka hok,” u la ong.