Pynrem jur bad dawa sdien phasi ka FKJGP ïa kiba donkti pynïap briew

Nongstoiñ, Rymphang, 17: Ka FKJGP Riangpoit Unit ka pynpaw ka jingsngewsih kaba jur, ban tip ba ka jingthombor ïa ki kynthei khynnah ka la rung wat ha ki nongkyndong kynshrot, kaba la ju tip ba ka jingim suk im saiñ ka don satang ha ki shnong kyndong.
Ki nongïalam ka seng ha ka jingïakren bad ki lad pathai khubor, ka pynrem jur bad ka dawa ruh na ka tnad pulit ban thwet ha ban da lap ïa u riew poh jait bad ban ai da ka jingpyn saja da ka set patok shirta lane wat ban shu phasi noh, khnang ba kum kine ki jait kam ba pynsuh jer ïa ka dong ka thaiñ kin ym jia shuh nangne shakhmat.
Kum ban shu pynkynmaw kane ka lanot ka dei ka riew marwei kaba shu im kyndoi ja kpoh da kaba shu bylla mynsngi bam da miet, ban pyndap ïa ka jingdonkam jong ki san ngut ki khun, namar ba u kpa nongkyrshan u la khlad noh la katto katne snem.
“Kane ka longkmie mynta ka la shah phah iehnoh khunswet jubor noh ha u ba don mynsiem mrad bad ngim tip shuh kaei ka ban jia ïa ka lawei ba jong kine ki san ngut ki khun. Ka seng ka kyntu bad kyrpad sha ki bor ba dei peit, khamtam na ka tnad jong ka social welfare ban peit bad khmih lem na ka bynta ka bit ka biang jong kine ki khun”, ong u samla E.Ryntong Secretary Maweit circle.
U la ong ruh, “Ka seng hadien ka jingïashong pyrkhat bad ki nongïalam shnong, ka la sngew dei ban pynlong da ka jingïaid paitbah, ban dawa ban thwet ha ban da lap ïa u riew pohjait, ban pynshitom tyngeh da kaba phasi ne set patok shirta jingim. Kane ka rally yn pynlong ha ka 21 tarik mynta u bnai naduh ka por 11 baje mynstep na Riangpoit thymmai shaduh ïing jong katei ka lanot”.
Ka Seng ryngkat ki nongïalam shnong ka kyrpad ïa kat kiba lah ban wan ïa shim bynta lang ha katei ka sngi, ban pyni ba kum ka dong ka thaiñ yn ym lah ban pdiang da lei lei ruh ha ka imlang sahlang. Ïa katei ka rally la khot pynlong da ka dorbar shnong Riangpoit, ka Riangpoit thymmai ryngkat ka FKJGP Riangpoit Unit.