Ai jingïarap ka HANM ïa ki khunswet ka longkmie ba shah pynïap ha Riangpoit Thymmai

Nongstoiñ, Rymphang, 17: Ka HANM WKHD hapoh ka jingïalam jong u President ka District u Bah Willstone Sohshang, ha ka sngi thohdieng ki la hiar sha ka shnong Riangpoit thymmai, ban leit jngoh ban ai mynsiem ïa ki khun bad kiba haïing jong ka lanot kaba la shah batbor bad shah bthat jubor ïa ka jingim ha ka rukom kaba sngew shyrkhei, kaba la jia ha ka step jong ka 14 tarik mynta u bnai.
Ka seng ka dap da ka jingkthang mynsiem, namar katei ka longkmie ba ngat ha katei ka apot, ka dei ka riew kynthei kaba bylla marwei, ban bsa ïa la ki san ngut ki khun naduh u snem 2012, hadien ka jingkhlad noh jong u lok jong ka, kata katkum ka jingïathuh u hymmen rangbah u Bah Justin Lyngdoh Mar-shillong.
Ka seng hadien ka jingïasyllok bad kiba haïing baroh ha ryngkat ki khun san ngut, ka la noh synñiang da ki mar bam mar dih bad khyndiat ka song pisa. Ka seng ka la rai ruh ban dawa na ka tnad pulit, ban tohkit bniah ïa kane ka kam bad ban pynshitom da kaba tyngeh ïa ki riew thrang snam.
“Ban teh lakam ïa kiba kum kine ki kam sniew kiba la nang jyllei na ka por sha ka por, ka seng ka la rai ruh ban shim ïa ka sien jam ban pyntreikam noh da ka ‘Syllad naphang Operation’, ban ïakhun tyngeh ïa kine ki riew thrang snam kiba la pynshong syier haduh katta ïa ka imlang ka sahlang ha ka jaidbynriew Hyn-ñiewtrep”, ong u President HANM WKHD Bah Willstone Sohshang.
Kumjuh ruh na ka liang ka HYC West Khasi Hills ha ka jingïalam jong u samla Lumlang Kharsyiemlieh, kum ka dak ka jingsngewlem bad ka jingpynrem ïa kane ka jingjia ba sngewsih ha Riangpoit thymmai kaba la jia ïa ka kong (L) Metilda Marshillong, ha ka janmiet sngi thohdieng, ka la pynlong ïa ka jingthang mombati sngewlem ha jingkieng Nonbah.
Ha kane ka jingïalang la pynlong jingsngap jar bad la ïoh jingkren na I Kong Candida Marweiñ General Secretary HYC Women Wing, kaba la ong ba ki longkmie ki dap da ki jingeh bad khuslai mynsiem kat shaba phai. Hato ki rangbah kim don kmie, para ne hymmen kynthei mo bad balei kim pyrkhat lem, haba kum kine ki jingjia ki jia hapoh ka jaidbynriew.
Ka kong A.K Kharsyntiew General Secretary Sengkmie New Nongstoiñ, ka la ong ka aiñ ka dei ban ai eh bad ka dei ban kem mardor ïa baroh kiba donkti. U samla Wanteibok Lyngdoh GS HYC WKHD, u la ong balei ka Jaidbynriew katne katne eh ka hiar dor. Ka Jaitbynriew kaba tip briew tip Blei, mynta katne katne. U la ong ba ka seng HYC ka pynrem bad ka dawa ban phasi ïa ki runar ba donkti.
La donlang ha ka jingïalang da u samla Lumlang Kharsyiemlieh President HYC WKHD, Samla Chester Kharbani President HYC Nongstoiñ Circle bad ki paitbah.