Pynpra ki nongïakhih ïa u mot Syiem Tirot Sing, wiang ding ïa ka IGCC ha Dhaka

Shillong, Nailar, 06: Ka jingklang jong ka ding ha ka ri Bangladesh kaba dang bteng haduh mynta ka la pynpangnud ïa ka jaidbynriew Khasi, ïa ka Sorkar Meghalaya bad kumjuh ruh ïa ka Sorkar India hadien ba ki nongïakhih ki la wiang da ka ding ïa ka Indira Gandhi Cultural Centre (IGCC) kaba don ha nongbah Dhaka, Bangladesh bad pynpra ruh wat ïa u durmot jong u Syiem Tirot Sing ba la tei pynsahnam ha kane ka Centre.
Ïa u durmot jong u Syiem Tirot Sing la plie paidbah ha ka 16 tarik Rymphang, 2024 da u Symbud Myntri Rangbah ka Jylla u Bah Sniawbhalang Dhar ryngkat ka jingsakahi lang jong u Myntri ka tnat Arts and Culture u Bah Paul Lyngdoh, u High Commissioner jong ka ri India sha Bangladesh u Pranay Verma bad kiwei kiwei ki kynrem ki lyndan.
Ha ka video ba la ïoh ring da ka lad pathai khubor News Nine, la pyni ba ki nongïakhih ki la pynjulor bad lute lut naphang ïa ki tiar ki tiar bad ki jingbuh jingsat kiba don hapoh kane ka Centre.
U Myntri ka tnat Arts and Culture u Bah Paul Lyngdoh haba pynthikna ïa kane ka jingjia, u la ong, “nga dang shu ïohi ïa ka video ba la saphriang ha ka Social Media ba la pynjulor naphang ïa ka Indira Gandhi Cultural Centre. Ïa u motdur jong u Syiem Tirot Sing ruh la pynjulor da ki paidbhur.”
Haba kylli, u la ong, “ngi dang shu peit ïa ka jingjia lyngba ka video dang kumba san minit eiei. Kaba paw shynna hi ka don ka jingpyrshah India kaba jur kaba jia ha katai ka ri bad ka jinghiar thma ka long pyrshah ïa ka Indian High Commission. Namar ïa u durmot la pynieng ha phyllaw jong ka Centre u la ngat lang ha ka jingshah pynjot ha ki paidbhur.”
U la ong ruh, “katkum ba ka paw ha ka video ki paidbhur ki la pynpra tang ïa u durmot, katba ïa ka jingthoh ïa ka kyrteng jong u Tirot Sing ka dang neh,” bad bynrap ruh ba un sa pan ruh ïa ka jingtip kaba bniah ban pynshisha halor kane ka jingjia.
Tang shu saphriang ka video ha ka Social Media, ki paid Khasi ki la pynrem jur ïa kane ka jingjia bad kynthoh ruh ba ka dei jingleh riewkhlaw jong ki nongshong shnong ka ri Bangladesh ki bym burom shuh ïa ki jingtei nam jong ka Sorkar India namarba ka jingtei nam ïa u durmot jong u Syiem Tirot Sing ha ka ri Bangladesh ka long namarba une u Syiem jong ka Hima Nongkhlaw u la ïap ha ka 17 tarik, Naitung, 1835 mynba u dang don hapdeng ka jingshah set byndi ha ka Sorkar Phareng ha Dhaka.
Lyngba ka video la sakhi ruh ba ki nongïakhih ki la kyrdem bad iuh naphang ïa ki Cassette VCR ba la buh kyrpang hapoh ka Indira Gandhi Cultural Centre (IGCC) lehse ki dei kiba la ringdur ïa ki jingjia ha ki snem kiba kham mynshwa.
Ka jingshah pynpra jong kane ka Centre kynthup ruh u durmot jong u Syiem Tirot Sing ka la jia tang hadien shi sngi ba ka Sheikh Hasina ka la resaiñ na ka kam Myntri Rangbahduh jong ka ri Bangladesh bad wan phet rieh sha ri India.
Shuh shuh ki khubor ki pyntip ruh ba ki paidbah nongïakhih ki la pynjulor ruh wat ïa ka ingsah sorkar jong ka Sheikh Hasina tang hapoh khyndiat kynta ba ka la resaiñ na ka kam Myntri Rangbahduh bad pynpra ruh wat ïa u durmot jong u Sheik Majibur Rehman uba la tei ha ki bynta bapher bapher ka ri Bangladesh, uba dei ruh u kpa jong ka Sheikh Hasina.
Ka Bharatiya Janata Party Meghalaya ka la pynrem jur ïa ki paidbhur kiba pynjot pynpra ïa u durmot jong u Syiem Tirot Sing ha nongbah Dhaka uba dang shu tep tei dang hapoh hynriew bnai bad ong ba ka dei ka kam riewkhlaw jong ki Jehadist ha Bangladesh.
Ka BJP Meghalaya ka la kynthoh ruh ba kane ka kam riewkhlaw ka dei ka jingbeiñ ïa ka jingtei sah kynmaw ïa u Khlawai bad ka pynmong ruh ïa ka jingsngew jong baroh ki nongshong shnong ha kane ka jylla bad ha ka ri baroh kawei.
“Ka party ka kyrpad ïa ka Sorkar Pdeng ba kan shimkhia ïa kane ka kam bad ki bor ba dei peit jong ka ri bamarjan ha kum kane ka khyllipmat, ban pynthikna ban ïada ïa ki jingtei sahnam bad ban pynkut noh ïa ka jingïaumsnam pyrshah ïa ki ritpaid ha ka ri Bangladesh, ong u kyrwoh na u Chief Spokesperson ka BJP u Bah Mariahom Kharkrang.
“Ki dur kiba paw pyrthei ha ka ri Bangladesh kan pynkyndit ïa kino kino ki briew kiba la shai, ha kano kano ka bynta jong ka pyrthei. Ka jingpynjot dusmon ïa u mot tei sah kynmaw jong u Syiem Tirot Sing, bad ka jinghiar thma pyrshah ïa ki ritpaid bad ïa ki jaka mane blei ha ka ri Bangladesh ka long ka bym lah satia ban pdiang daleilei ruh em bad ka buh ïa ngi ha ka jingkyndit katlah katïai,” ong u kyrwoh.
“Ngi duwai ba ka shongsuk shongsaiñ (ha ka ri Bangladesh) kan wan phai biang sa shisien pat,” la bynrap u kyrwoh.