Nongstoiñ, Naiwieng, 17: Mynta ka sngi palei ka 17 tarik Naiwieng, ki nongïalam bad ki dkhot ka Hynñiew-trep Youth Council hapoh ka jingïalam jong u samla Lumlang Kharsyiemlieh President, ki la leit tur sha ka ophis jong u Superintendent of Police West Khasi Hills, ban dawa ba ki pulit ki dei ban pynphai noh ïa ki lama ba ki la knieh ha ka khyndai tarik Naiwieng ha Rambrai, ha ka por ba ki la leit ban pynsngew ïa ki khyndai tylli ki mat jingdawa jong ka Save Hynñiewtrep Mission.
Kum ban pynkynmaw ba ha katei ka sngi khyndai tarik, u Conrad Kongal Sangma Myntri rangbah ka jylla, u la leit ban plie ïa u maw nongrim jong ka Rambrai C&RD Block, ha kaba ki dkhot ka HYC bad kiwei pat ki sengbhalang kiba ïatrei lang ha ka Save Hynñiewtrep Mission, ki la leit ban rah ïa ki lama bad ki banner ban pynsngew ha u Myntri Rangbah bad ka sorkar ba kan pyurlong noh ïa ki khyndai tylli ki mat jingdawa jong ka, ha kaba ki pulit ki la khang lynti bad ki la knieh ruh ïa ki banner bad ki lama jong ka HYC.
Ha katei ka jingleit tur jong ki dlkhot ka HYC, na ka liang u SP u la bthah ïa ki pulit jong u ba kin pynphai noh ïa kitei ki lama bad ki banner. Halor kane u samla Lumlang Kharsyiemlieh President ka HYC West Khasi Hills, haba ïakren bad ki ladpathai khubor u la ong ba ka seng kam don kano kano ka jingpyrshah ïa ki pulit, hynrei lada ki dkhot ka seng ki mih madan ban dawa na ka sorkar ïa ki mat ki hura ba ka jaitbynriew ka donkam, ki pulit kim dei ban ai ding ne pynbitar ïa ka seng. U la ong ruh ba ka jingshah ktah kti bad ka jingmynsaw ba malu mala jong ki dkhot ka seng ha ka jingïaknieh lama ha Rambrai ka long pynban ka jingkyrkhu ïa ka seng.
