Mawkyrwat, ‘Naiwieng, 17: Ka Khasi Student’s Union (KSU) South West Khasi Hills District lyngba kane ka kyrwoh na u bah Forwardman Nongrem, President KSU South West Khasi Hills District ka la dawa na ka sorkar Meghalaya ba ka dei ban wanrah noh ïa ka Community and Rural Development Block ha Wahkaji ne Umdohlun jong ka South West Khasi Hills District.
Ka KSU South West Khasi Hills District ka la ban jur ruh ba kane ka mat kam dei shuh kaba dang thymmai hynrei ka dei ka mat kaba ki paidbah ka thaiñ bad ka seng ki la dawa la slem bah.
Shuh shuh la ong ruh ba ka jingai ia ka C&RD Block ka dei kaba donkam tam hapoh ka thaiñ na ka bynta ki 44 tylli ki shnong jong ka thaiñ Phlangdiloin, Umdohlun bad Warsan Lyngdoh namar ki paidbah jong kine ki shnong ki don kiba hap mynta hapoh Mawkyrwat C&RD Block bad ki hap ban iaid kumba 30 haduh 50 kilometar ban poi sha Mawkyrwat bad ki hap ban shong kali haduh 3 kynta ei ei. Ki don pat ki shnong hapoh ka thaiñ Phlangdiloiñ kiba hap hapoh ka Ranikor C&RD Block pat ki hap ban ïaid kjat haduh 3 kynta ban poi sha Ranikor, u la ong bad pynshai ruh ba kine ki dei kiwei na ki jingeh kiba ki paidbah jong kine ki thaiñ ki ïa kynduh naduh ki por ba mynshwa haduh mynta bad kane ka la buh jingeh ïa ki bad ka la pynjynjar ïa ki shnong bad ki paidbah haba pyntrei ïa ki jingtrei 100 sngi ne MGNREGS bad ruh halor ki skhim ba hap hapoh ka National Social Assistance Programme (NSAP) bad kiwei kiwei ruh ki lad pynroi ba hap ban leh na ki ophis Block.
Ka seng namarkata, naduh u snem 2015, 2016, 2017 ka la pynsngew ïa kine ki mat sha ka sorkar bar ha u bnai Rymphang jong u snem 2022 ruh ka la leit ban ïa kynduh ïa u bah Hamletson Dohling uba dei u Myntri Sorkar ba dei peit ïa ka C&RD Department ban pynsngew ïa kine ki jingeh.
Kumta ka seng ka ïai ban ban pynsngew ha ka sorkar ba ka dei ban phai khmat lem ïa ki paidbah jong kine ki dong ki thaiñ da kaba ai noh da ka C&RD Block namar kane ka dong ka thaiñ ka dang dei kaba dang sah dien haduh mynta la ka long ha ka pule puthi bad ka roi ka par ruh kumjuh.
Ka seng ka dawa ruh ba ki Nongmihmat jong ka South West Khasi Hills District kata na u bah Rinikton Lyngdoh Tongkhar, MLA Mawkyrwat uba dei ruh u Myntri Sorkar, na u bah Carnes Sohshang, MDC ka Mawkyrwat bad kumjuh ruh na u bah Pius Marweiñ, MLA & MDC Ranikor Constituency ba ki dei ban kren ei ei bad ki dei ban pynbor ïa ka sorkar ba kan shimkhia halor kane ka bynta. Ka kyntu ruh ha kajuh ka por ïa ki nongïalam shnong ba ki dei ban shimkhia halor kane ka mat ban pynsngew ïa kane ka sur jong ka jingdonkam sha ka sorkar na ka bynta ka jingbit jingbiang jong ki paidbah hapoh ka thaiñ. Kane ka long ka kyrwoh na u bah Forwardman Nongrem, President ka KSU South West Khasi Hills District.
