Nongpoh, Naiwieng 11: Haba pynlong ïa ka jingïalehkai phutbol shi bynta ban pynmih pisa na ka bynta ban kyrshan halor shibun ki jingdonkam hapoh ka Presbytery Mawdem, ki nongïalam niam jong ka Presbytery Mawdem ki la pynpaw shibun ki jingdonkam hakhmat u MP ka Shillong, u Ma Vincent Pala haba leit ban shim bynta kum u kongsan ha katei ka jingïalehkai phutbol ba la pynlong ha Madan Western Ri Bhoi Dorbar ha Patharkhmah.
Kum ban pyntip, ka Presbytery Mawdem ka la pynlong da ka jingïalehkai phutbol ba la shim bynta da ki saw tylli ki district kata ki kynthup ïa ka Mawdem District, Mawskei District, Warmawsaw District bad ka Usmong Distsrict. Ha kane ka sngi la don ruh ka jingïalehkai phutbol hadpeng ki nongsharai balang bad ki ophisar sorkar ban pynphuh pynphieng ïa kane ka sngi.
Ha katei kasngi la sakhi lang ruh naduh ka jingdon lang u MP ka Shillong, u Ma Vicnet Ha. Pala, u MDC ka Mairang, u Bah Batskhem Ryntathiang, u president ka Ri Bhoi Western Dorbar, u Bah Eniarroy Rani, u sordar Shnong ka Patharkhmah, u Bah Petalman Thangkhiew, u Rev. S. Wahlang bad kiwei kiwei ki riew rangbah bad ki noingïalam niam na ka Presbytery Mawdem.
Ha kane ka sngi, na ka liang ka Presbytery Mawdem ki la ai ruh da ka dorkhas sha u MP ka Shilong, u Ma Vincent H. Pala ban pan ïa ki lad jingïarap na ka bynta ban tei ïa ka Youth Development Centre ha Patharkhmah bad kumjuh ruh ban ai jingïarap na ka bynta ban shna ïa ka ïingskul jong ka Jingïaseng Samla Presbytery English School, Patharkhmah, kiba long ka jingdonkam kaba hakhmat ban kyntiew ïa ka pule puthi bad ruh ban ioh ïa kata ka jaka ai jinghikai ba kyrpang ïa ki khun samla ba la tip kum ka Youth Development Centre.
Na ka liang u MP ka Shillong, u Ma Vincent H. Pala haba ai jingkren ha kane ka sngi u la ai ka jingïaroh ïa ki Presbytery Mawdem kiba la pynlong ïa kane jingïalehkai na ka bynta ban thaw lad thaw lynti ban pynmih pisa halor kiba bun ki jingdonkam bad kumba ki la aiti ïa ka dorkhas halor ki jingdonkam kane ka Prebytery Mawdem u la kular ruh ban ïatrei ryngkat na ka bynta ban pynurlong ïa kitei ki jingangnud ka Presbytery Mawdem.
La pynkut ruh ha kane ka sngi da ka jingsam ïa ki khusnam sha ka kynhun ba jop, ha kaba ïa kane ka jingïalehkai phutbol la rahd a ka Mawskei Distsrict kum ka lahduh bad la sam ruh ïa ki khusnam da u Ma Vicent H. Pala ryngkat kiwei kiba ïa don lang.
