Shillong, Jymmang: Ka Khasi Jaiñtia Presbyterian Synod Sepngi (KJPSS) kaba long ka sponsoring body jong ka KJP Girls’ Higher Secondary School, Shillong ka la khot kyrkieh ïa ka Executive Committee ha ka 24 tarik mynta u bnai halor ka jingjia ba sngewsih namar ka jingjia ryngkhat ba ka ding kala bam duh ïa ki jingtei kaba long ki matti barim jong ki Missionary ha ka step phyrngab jong ka 21 tarik mynta u bnai.Ka EC ka dap da ka jingsngewsih bad sngewkhia kaba khraw halor kane ka jingjia.
Kane ka jingjia shisha ka la ktah jur ïa ki nongpule bad ka la long ka jingduh kaba khraw ïa ki tiar ki tar bad ki mar ba kordor jong ka skul.Kane ka skul ka long kawei na ki skul ba la rim tam ha ka jylla bad ka thaiñ jong ka Ri, bad ka la sei bad pynmih ïa shibun ki longkmie kiba long ka jingkyrkhu bad jingmyntoi ïa ka imlang sahlang ha ka thaiñ bad ka Ri ha ki kyrdan bapher bapher.
Ha kaba kum kane ka jingjia ka Synod ha u kyrwoh lyngba u Rev. ER Kharkrang, Senior Executive Secretary ka pynpaw ka jingsngewnguh ïa I Principal, Vice principal, ki nonghikai, ki nongtrei kiba la shim ïa ka jingkitkhlieh ha kiba bun bynta ban peit bad pynbit pynbiang ïa ka jingdonkam ka skul kum ha kane ka por. Ka Synod ka kyntu ruh ïa ki kmie ki kpa bad ki khynnah skul ba kin ym don kano kano ka jingsngew namar ka Synod lem abd ki bor pynïaid jong ka skul ki la shim khia ban pynïaid beit ïa ki klas kumba ki dei ban long khnang ba kan ym don ka jingduh ïa ki nongpule.
Ka Synod ka pynpaw ruh ka jingsngewnguh eh ïa ka Dorbar Shnong Mission Compound baroh kawei kiba la shimkhia lang naduh ki nongkitkam shnong bad ki nongshong shnong kiba la ïarap bad ai jaka rieh shipor ha ka hall jong ka Dorbar Shnong na ka bynta ki khynnah hostel bad ki la pynbiang ïa ka sha step.
Kumta ka Synod ka pynpaw ruh ka jingsngew nguh ïa u Conrad Sangma Myntri Rangbah ka jylla, u Bah Adelbert Nongrum MLA ka thaiñ, Bah WR Kharlukhi MP Rajya Sabha bad kiwei pat ki dkhot ka kynhun Myntri ka sorkar, ki MLA, ki MDC, ki seng bhalang, ki riew shimet bad kiwei kiwei kiba la kloi ban ïasnohkti bad ïa don bynta ha kane ka jingjia ba sngewsih.
