Shillong, Nailar 9 : Ka Meghalaya Public Service Commission (MPSC) mynta ka Sngi Thohdieng ka la pynmih paidbah ïa ki Mark jong baroh ki candidate kiba ïaleh ïa ka eksamin Preliminary ka Meghalaya Civil Services (MCS) .
“ïa ki mark jong kiba ïaleh ïa ka MCS Preliminary Examination la pynmih paidbah mynta ka sngi” ong ka jingpynbna ba la pynmih da u Chief Controller of Examination jong ka MPSC.
Ha kajuh ka por ka MPSC ka la pyndam noh ïa ka jingpynbna ba ka la pynmih ha ka 6 tarik Nailar 2024 ha kaba ïadei bad ka jingpan jingmynjur na baroh ki candidate kiba ïaleh ïa ka eksamin na ka bynta ban pynpaw paidbah ïa ki mark jongki. Ka la pynmih ruh ïa ki jubab jongka MCS Priliminary Examination ba la pynlong ha u Naiwieng 2023.
Ha kajuh ka por ka MPSC ka la pynbna ruh ba ka la pynkynriah ïa ka persanal interview jong kiba pass ïa ka Megalaya Police Service (MCS). “ Na ki daw kiba ym lah ban kiar ïa ka personal interview jong ka MPS ha ka tnad Home (Police) (Aug 2019) kaba la pynbna ha ka 25 tarik Naitung 2024 la rai ban pynkynriah noh tad haduh ban da ai jingpynbna da kumwei pat. La kyntu ïa ki candidate ba kin peit ïa ka Website jongka Commission na ka bynta ki jingtip ba kham bniah” ong ka jingpynbna.
ïa kane ka jingpynbna la pynmih hapoh 24 kynta hadien ka jingïalang hapdeng ki nongïalam ka KSU bad u Chairman ka MPSC. Ha ka Sngi Palei ka KSU ka la thang ruh ïa ki tyngshop ka MPSC kum ka dak ban pyrshah ïa ka jingbym treh jongka MPSC ha kaba nyngkong ban pynmih paidbah ïa ki mark jong kiba ïaleh ïa ka MCS.
