Ha Parliament pynpaw u Dr Ricky ïa ka jingdon ki High Level ha kam tih dewïong

Delhi, Nailar 9: U MP jong ka Shillong u Dr Ricky AJ Syngkon ha ka sngi Thohdieng jong ka 9 tarik Nailar u la ïathuh hakhmat ka ïing dorbar Parliament jong ka Lok Sabha ïa ka jingdon kita ki kynhun High Level ha ka kam tih bad shalan dewïong beaiñ ha ka jylla naduh ba la khang tih dewïong da ka NGT ha u snem 2014.
Haba shim bynta ha ka mat ïatai Zero Hour ha Lok Sabha u la ong ba kumba long mynta ka jingkhang tih dewïong ha ka jylla ka long tang ïa kiba rit ba ria hynrei kita kiba don jingïadei bad ki heh ki haiñ ne High Level ki ïoh tih bad shalan dewïong beit wat la ka don ka jingpynjari ba ym dei ban tih dewïong liew khnai ha ka jylla.
“Lada khang ban tih dewïong dei ban khang salonsar bad lada bteng ban tih ruh dei ban ailad ïa baroh ym ban tih tang da ki katto katne katba kiba bun pat kim ïoh lad namar ka kam dewïong ka dei ka kam kamai kaba uba bun u im ja, hynrei mynta tang ki High Level kiba ïoh lad bad tih bad ka sorkar jylla ruh kam leh eiei ïa kane,” u la ong.
Kumjuh u MP jong ka Tura u Saleng Sangma haba kren ha Lok Sabha u la ïathuh ïa ka jingrung kyrthep ki mynder sha ka jylla na ka daw bym don kano kano ka lad jingïada ïa ka jylla. U la ong ba da palat ar hajar Kilo Meter ki jylla ka Northeast ki long mar khappud bad ka Bangladesh bad ka jingrung kyrthep ki mynder na kata ka daw ka jur bha.
U la ong ba ka jingdon ki Rohingya ruh ha Northeast ka jur bha bad mynta na ka jingïakhih kaba la jia sa ha Bangladesh ka jingrung ki mynder kan nang shyrkhei shuh shuh lada ym ai kino kino ki jingïada bad ka jingpahara kaba paka khamtam ïa ka Meghalaya.
“Dang hynnin ka sngi da ki hajar ki Khar Bangla ki pyrshang ban rung be-aiñ sha ka jylla Meghalaya bad kane ka long ka jingma kaba khraw na kata ka daw nga kyrpad ïa ka tnat korbar ri jong ka sorkar pdeng ban shim khia ïa kane ka mat ban I jingshngaiñ ïa ki trai muluk ha ka thaiñ Shatei Lam Mihngi ka ri,” u la ong.