Jowai, Risaw, 01: U District Magistrate ka West Jaiñtia Hills District u bah B.S Sohliya, IAS, ula pynmih biang sa kawei ka hukum ha ka 30/09/2024 kaba hapoh ka Section 163 BNSS kaba long ruh shi bynta ban bteng ïa ka jingtreikam jong ka Office Order Under Section 144 CrPC Dt.26/06/2024.
La hap ban pynmih ïa kane ka hukum ka long hadien ba la lap ba ka jinglong jingman jong ka um ha ka Wah Myntdu bad ki shnat wah jong ka, ki la kylla ktieh na ka daw jong ka jingwan tuid jong ki jaboh.
La lap ruh ba ka dang don ka jingbteng jong ka jingtih bad khlong maw be-aiñ ha ki rud jong ka wah Myntdu.
La pyntip ba na kane ka daw kala wan rah ka jingjaboh jong ka um dih kaba la pynpoi sha ki thliew ïing jong ki nongshong shnong ka nongbah Jowai.
Kumta na ka liang jong u DM ula pynmih ïa katei ka hukum U/S 163 BNSS ban khang pyrshah ïa ka jingtihmaw ha baroh shi lynter jong ka Wah Myntdu. La khang ruh ïa ka jingshait jaiñ, sait kali, ka jinglumthup ïa ki jakhlia (Solid/Liquid) ha ki bynta jong ka Wah Myntdu. La khang pyrshah ïa ka jingbret pathar ne lumthup ïa ki jakhlia kum ki diaper bad ki sanitary pads ha ki bynta bad ki rud jong ka Wah Myntdu.
Kane ka hukum kan treikam naduh ba la pynmih ïa ka ha ka 30/09/2024 tad haduh ban da pynmih da kawei pat.
