Pynlong prokram ai jingpynshai ka tnat pulit Ladrymbai OP halor jingshyrkhei u drok

Khliehriat, Risaw 28: Ka tnat pulit jong ka Ladrymbai Outpost, East Jaiñtia Hills District, hynnin ka sngi ka la pylong ïa ka prokram ai jingpynshai sha ki khynnah skul halor ka jingshyrkhei u drok bad ïa kane ka prokram la pynlong ha Tep Kyndait ha Tuber, u Officer Incharge jong katei ka OP, u Sub Inspector C.G.R.Rymbai u la ai ka jingbatai bad jingpynshai sha ki khynnah da kaba pyni ruh bad ki dur jong ki jait drok bapher bapher lyngba ka projector.
Utei u heh pulit u la ong ruh ba ki don bun hapoh East Jaiñtia Hills District kiba pyndonkam drok bad kiba la ngop ha ka jingdih drok, u la kyntu ïa ki khynnah skul ba ki dei ban don ka jingmut kaba skhem ba kim dei da lei lei ruh ban ngop ha u drok, namar u drok u ktah haduh katta katta ïa ka koit ka khiah bad ruh u buh jingeh ïa ka ïing ka sem kumjuh ruh ka im lang ka sah lang.
Ha kane ka prokram, la pyni dur ruh ym tang ki drok, hynrei ki jait ganja bapher bapher ruh bad kiwei kiwei ki jait jingdih kiba sniew kiba la pyrshang ban khaïi beaiñ, kiba la ioh kurup noh da ki pulit jong ka East Jaiñtia Hills District.
U Headmaster jong katei ka skul, u bah R. Laloo, u la ai khublei ïa ka tnat pulit Ladrymbai kaba la wan ban pynlong ïa kane ka prokram ai jingpynshai kaba ai jingpynshai ïa ki khynnah halor ka jingshyrkhei u drok, kane ka prokram ka la ai jingmyntoi bad iarap ruh ïa ki khynnah ba kin ioh mynsiem, ioh bor bad ruh kin sngewthuh kumno ban lait na u drok bad ruh na ka jingdih sikret, u la kyntu ruh ïa ki khynnah skul ba ki dei ban pdiang ïa ki jinghikai ki jingsneng, jingkyntu ba ki la ioh, ba kin long ruh ma ki ki ban hikai ïa kiwei ruh ha ka im lang ka sah lang ban lait na ki jingsniew kum u drok, u sikret bad u duma.
Na ka liang jong u ruh kum u nongpynïaid skul u la kyntu jur ïa ki khynnah ba kim dei satia ban ktah ïa u drok bad kiwei kiwei ki jait jingbam jingdih kiba sniew, kiba ktah ïa ka koit ka khiah bad ïa ka im lang ka sah lang.