Jowai, Lber 21: Kawei na ki seng treimon sngewbha ka ‘Mihmyntdu Community Social Welfare Association’ (MCSWA) mynta ka sngi 21 tarik u Lber kala pynlong ïa ka prokram ai jinghikai ne ka “Village Awareness Programme” halor ka jingpang HIV/AIDS haka shnong Tyrshang kaba hap hapoh ka Thadlaskeiñ Block West Jaiñtia Hills
La ïarap ban bei pisa ïa kane ka prokram ai jinghikai da ka Meghalaya Aids Control Society, Shillong bad kane ka prokram kala long shisha ka jingmyntoi kaba khraw eh ïa ki nongwan naduh ki longkmie bad ki khun samla shynrang bad kynthei kiba la ïoh shibun ki jingbatai ba kham bniah na ki riew shemphang jong kane ka sngi.
Ïa ka jingïalang la pynïaid da u General Secretary ka Shnong ma M. Dkhar, la ïoh ka jingkren halor kane ka jait jingpang HIV/AIDS da ka kong Yoo-I ka Bareh ka Programme Manage. Katba ka Dr. J.N. Shullai kala ai jingbatai bniah shaphang kane ka jait jingpang bad ki lad jingïada ban lait na ka jingbit pateng na ka kmie sha ki khun.
