Jowai, Risaw 12: Ka District Disaster Management Authority (DDMA) West Jaiñtia Hills mynta ka sngi ka la ïashim bynta lang ban pynlong ïa ka State Level Mock Exercise halor u jumai bad ka jingtwa khyndew kaba lah ban wan lyngshop ha kano kano ka por, ïa kaba la khot pynlong da ka Meghalaya State Disaster Management Authority (MSDMA), ha ryngkat ka jingïatrei lang bad ka National Disaster Management Authority (NDMA).
Ha ba sdang ïa katei ka Mock Drill ha Jowai la don ka jingpynsawa ïa ka siren haka por 9 baje mynstep ban pyni ba ka don ka jingkhynñiuh u jumai, ïa kane ka Mock Exercise la pynlong ha Iaphi shopping complex, ha Bharat Petrol pump, ha Gate Laban, ha Presbyterian School bad ha Compound, Jowai.
La buh ruh ïa ki jaka sumar (relief camp) ha ka Hall jong ka Dorbar Shnong Lion Mission, Jowai. ïa kane ka relief camp la buh khnang na ka bynta jong kito kiba shah kthah ban kin ïoh jingsumar kloi.
