Khliehriat risaw 12: Kumba long ha kiwei kiwei ki jaka hapoh ka jylla, ha East Jaiñtia Hills District ruh la pynlong ïa ka Mock Exercise ha kiba bun tylli ki jaka, kane ka mock exercide ka long ban ai jinghilai ruh ïa ki paidbah ba kin tip kumno ban leh ban ai jingiarap lada khie u jumai bad lada jia ban don ka jingtwa khydew bad jingtwa ki iïng ki sem, ïa kane ka prokram la pynlong da ka tnat Meghalaya State Disaster Management Authority (MSDMA), ha ryngkat ka jingïatreilang bad ka National Disaster Management Authority (NDMA), Ministry of Home Affairs, Government of India, the District Disaster Management Authority (DDMA), East Jaiñtia Hills District.
Ïa kane ka mock exercide la pynlong ha shnong Khliehriat West, ha ophis jong u Block Development Officer, Khliehriat, ha Khliehriat Presbyterian Secondary School, ha Khliehriat, Civil Hospital, kumjuh ruh ha 1-India Family Mart, Khliehriat, ha Seiñ Raij L.P School, ha Moolyngkut bad ha karkhana dewbilat jong ka Meghalaya Cements Ltd, Thangskai, la pynit pynbiang ïa kane ka mock exercide na madan Khliehriat Higher Secondary School.
Ha baroh ki jingpynlong ïa kane ka exercide la leh katkum ka Incident Response System (IRS) bad baroh ki kynhun ba shim bynta ha kane ka Incident Response ba kynthup naduh ki Operations, Planning bad Logistic Sections la leh thik pa thik bad kane ka exercise ka la ïaid beit bad ïaid ryntih bha.
La ai jinghikai bad pyni nuksa ïa kane ka mock exercise halor kumno ban leh haba shah tap ha ka ïing building ba twa kumno ban ai jingsumar kyrkieh ïa kiba shah ktah, kumno ban thep ïa ki briew ba mynsaw hapoh ki kali kit nongpang, la shim bynta lang ruh ha kane ka mock exercise da ki tnat sorkar bapher bapher ba kynthup ka tnat pulit, ki pulit pynlip ding (Police, Fire & Emergency Services), Civil Defence & Home Guards, ka kynhun na ka tnat ka koit ka khiah, ki nongshong shnong na ki shnong bapher bapher, ki nongiarap kiba la wan na ka NSS Units na Jaiñtia Eastern College, Khliehriat bad na Don Bosco College, Byndihati bad kiwei kiwei ki riew paidbah ruh ki la wan ban ïa shim bynta.
Hadien kane ka Mock Exercise, ka la don ruh ka jingiakren bad baroh ki Districts ba la pynlong lyngba ka video conferencing ha ophis u Deputy Commissioner.
Ka jingthmu jong kane ka jingpynlong ïa kane ka mock exercise ka long ban peit bad bishar bha ïa ka jingthmu jong ka tnat Disaster Management Plan jong ka District, kumjuh ruh ban peit ïa ki jingkitkhlieh jong ki tnat sorkar bapher bapher kaba katkum ka IRS ban don ka jingïatreilang ha ka por ba donkam kyrkieh lane ka Emergency Support Functions (ESF) hapoh ka district bad ruh kane ka long kum ka jingai jinghikai ïa ki paidbah.
